ކޯރާޑިއަކުން މީހެއްގެ ބޮލުގަ ޖަހާފަ ފިލަން އުޅުނު ބަޔަކު ހައްޔަރުކޮށްފި އެވެ.
ހުޅުމާލެ ރެހެންދި ޓާފަ ދަނޑުކައިރީ ރޭ 11:35 ހާއިރު ހިނގި މާރާމާރީ އަކާއި ގުޅިގެން ފުލުހުން ހައްޔަރުކޮށްފައިވަނީ ގދ ފިޔޯރީ ހީނާމާގޭ، އުމުރުން 25 އަހަރުގެ ރުސްތުމް އިބްރާހިމް، އާއި ބ. ގޮއިދޫ ޒުވާނެއް ކަމުގައިވާ އުމުރުން 19 އަހަރުގެ ސައިފުﷲ ފައިސަލް އެވެ.
އެ 2 މީހުން ހައްޔަރުކޮށްފައިވަނީ ކޯރާޑިއަކުން މީހަކަށް ހަމަލާ ދިނުމަށް ފަހު ފިލަން މާލެ އަށް ދަނިކޮށް ބްރިޖް ހައިވޭ މަތިން ކަމަށާއި، އެ މީހުން އަތުން މާރާމާރީ ހިންގަން ބޭނުން ކުރި ކަމަށް ތުހުމަތު ކުރެވޭ ހަތިޔާރާއި ވަޅިއެއް ވެސް ފެނިފައިވާ ކަމަށް ފުލުހުން ބުނެފައިވެއެވެ.
