ކޭ-ޕާކުން ފެލެޓް ގަނެފައިވާ ފަރާތްތަކުން ޝަކުވާއެއް އޮތްނަމަ ހުށަހަޅަން ފުލުހުން އެދިއްޖެ

ހުޅުމާލޭގައި ހަދަމުން އަންނަ ކޭ-ޕާކް ރެސިޑެންސްގެ ފެލެޓް ގަނެފައިވާ ފަރާތްތަކުން އެއްވެސް ޝަކުވާއެއް އޮތްނަމަ އެކަން ވީ އެންމެ އަވަހަކަށް ހުށަހަޅުމަށް ފުލުހުން އެދިއްޖެއެވެ. ފުލުހުން މިރޭ ނެރުނު ބަޔާނެއްގައި ބުނީ، ހަންބޯ ޕްރައިވެޓް ލިމިޓެޑާއި އާބަންކޯ އާއިއެކު ހަދާފައިވާ އެއްބަސްވުމުގެ ދަށުން ހުޅުމާލޭގައި އިމާރާތްކުރަމުންދާ ކޭ-ޕާކްގެ އެޕާޓްމަންޓުތައް ހަންބޯ ކޮމްޕެނީގެ ނަމުގައި ހަދާފައިވާ ފޯޖު ލިޔުންތަކެއް ބޭނުން ކޮށްގެން މަކަރާއި ހީލަތުން އެޕާޓްމަންޓުތައް ވިއްކައި އެ ފައިސާ އަށް ހިޔާނާތްތެރިވި މައްސަލަ ފުލުހުން ތަހުގީގު ކުރަމުން އަންނަ ކަމަށެވެ. އެހެން ކަމުން ކޭ-ޕާކް ރެޒިޑެންސް އިން އެޕާޓްމަންޓް ގަނެފައިވާ ފަރާތްތަކުން އެއްވެސް ޝަކުވާއެއް އޮތް ނަމަ ވީ އެންމެ އަވަހަކަށް ފުލުހުންގެ އިކޮނޮމިކް ކްރައިމް  ޑިޕާޓްމަންޓަށް އަންގަން އެދޭ ކަމަށް ވެސް އެ ބަޔާނުގައި ބުނެފައިވެ އެވެ. ކޭ ޕާކް ނަމުގައި މަކަރާއި ހިލާތުން އެޕާޓުމެންޓް ވިއްކި މައްސަލައިގެ ތުހުމަތުގައި ފުލުހުން ވަނީ އެ ކުންފުނީގެ މައިނޯރިޓީ ހިއްސާދާރު ހަސަން މަމްދޫހު (މަންޑޭ) ގެ ޕާސްޕޯޓް ހިފަހައްޓައިފައެވެ.

މި މައްސަލަ ފުލުހަށް ހުށަހެޅީ އެ މަސައްކަތް ކުރާ ކޮރެއާގެ ހަންބޯ ޓެކް ކުންފުނީގެ ރާއްޖޭގެ އޭޖެންޓް ހަންބޯ ކޮމްޕެނީ ޕްރައިވެޓް ލިމިޑެޓުންނެވެ.

ހަންބޯއިން ނެރުނު ބަޔާނެއްގައި ބުނެފައިވަނީ ކޭ-ޕާކް ފްލެޓްތައް މަކަރާއި ހީލަތުން ގިނަ އަދަދެއްގެ ބަޔަކަށް ވިއްކާފައިވާކަން ފާހަގަކުރެވިފައިވާ ކަމަށާއި، އެކަން ކޮށްފައިވަނީ މަންޑޭ ކަމަށް އެ ކުންފުނިން ވަނީ ތުހުމަތުކޮށްފައިކަމަށެވެ.