ޖޭޕީގެ ކެމްޕެއިންގެ ޕްލޭނިންއާއި ގުޅުންހުރި މަސައްކަތްތައް އަމީންއާއި ހަވާލުކޮށްފި

މިއަހަރު ބާއްވާ ރިޔާސީ އިންތިޚާބުގެ ކެމްޕެއިން ޕްލޭނިންއާއި ގުޅުންހުރި މަސައްކަތްތައް ޖުމްހޫރީ ޕާޓީގެ ފަރާތުން ކުރައްވާ އިސްބޭފުޅެއްގެ ގޮތުގައި އެޕާޓީގެ ނައިބް ލީޑަރު އަމީން އިބްރާހިމް ހަމަޖައްސަވައިފިއެވެ. ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީން ވާދަކުރާނެކަން އިއުލާން ކުރުމަށްފަހު އިންތިހާބަށް ތައްޔާރުވުމުގެ މަސައްކަތްތައް ވަނީ ފަށާފައެވެ. މިގޮތުން ޕާޓީގެ ލީޑަރު ޤާސިމް އިބްރާހިމްގެ ސްޕެޝަލް އެންވޯއީންނާއި ސްޕެޝަލް އެޑްވައިޒަރުންނާއި އެޑްވައިޒަރުންގެ އިތުރުން އިތުރު ކޮމެޓީތައް ހިމެނެއެވެ. ޖޭޕީން މިއަދު ކުރި ޓްވީޓެއްގައި ބުނެފައިވަނީ އެޕާޓީގެ ކެމެޕެއިން ހަރަކާތްތައް ޕްލޭންކޮށް ކެމްޕޭނާއި ގުޅުންހުރި މަސައްކަތްތައް ކުރައްވާނެ ބޭފުޅެއްގެ ގޮތުގައި އަމީން އިބްރާހިމް ހަމަޖައްސާފައެވެ. https://twitter.com/JPSecretariat/status/1639156744650907648 އަދި އެޕާޓީން ވަނީ ކުރިއަށް އޮތް ރިޔާސީ އިންތިހާބުގައި ޖޭޕީއާ އެކު ކޯލިޝަން ހެދުމަށް ސިޔާސީ ޕާޓީތަކާ އެކު ބާއްވާ މަޝްވަރާތަކުގައި ޖޭޕީގެ ފަރާތުން ބައިވެރިވާނެ ބޭފުޅުންގެ ކޮމިޓީއެއް އުފައްދާފައެވެ. މި ކޮމިޓީގައި ތިއްބަވަނީ މަޖިލިހުގެ ކެންދޫ ދާއިރާގެ ޖޭޕީގެ މެމްބަރު އަލީ ހުސެއިނާއި ޖޭޕީގެ ޑެޕިއުޓީ ލީޑަރު އަމީން އިބްރާހިމާއި ގާސިމްގެ ސްޕެޝަލް އެޑްވައިޒަރު އަދި ވިލުފުށީ ދާއިރާގެ މެމްބަރު ރިޔާޒް ރަޝީދެވެ.