ޖަޕާންގެ ފޮރިން މިނިސްޓަރު ރާއްޖެ ވަޑައިގަންނަވަނީ

ޖަޕާންގެ ފޮރިން މިނިސްޓަރު ޔޮޝިމާސާ ހަޔަޝީ އަންނަ ހޮނިހިރު ދުވަހު ރާއްޖެ ވަޑައިގަންނަވާ ގޮތަށް ހަމަޖެހިއްޖެ އެވެ. ފޮރިން މިނިސްޓްރީން ބުނީ ދެ ދުވަހުގެ ރަސްމީ ދަތުރުފުގައި ޔޮޝިމާސާ ރާއްޖެ ވަޑައިގަންނަވަނީ ފޮރިން މިނިސްޓަރު އަބްދުﷲ ޝާހިދުގެ ދައުވަތަކަށް ކަމަށެވެ. ޖަޕާންގެ ފޮރިން މިނިސްޓަރުގެ މި ދަތުރުގައި ޝާހިދާ އެކު ރަސްމީ މަޝްވަރާތައް ބޭއްވުމުގެ އިތުރުން ޑިފެންސް މިނިސްޓަރު މާރިޔާ އަހުމަދު ދީދާއާ ބައްދަލު ކުރައްވާނެ ކަމަށެވެ. އަދި ދިވެހި ސަރުކާރާއި ޖަޕާނު ސަރުކާރާ ދެމެދު ހިއުމަން ރިސޯސް ޑިވެލޮޕްމަންޓް ސްކޮލަޝިޕް (ޖޭޑީއެސް) އާ ގުޅޭ އެއްބަސްވުމެއްގައި ސޮއިކުރާނެ ކަމަށް މިނިސްޓްރީން ބުނެފައިވެއެވެ. މިއީ 2018 ވަނަ އަހަރު ޖަޕާނުގެ ކުރީގެ ފޮރިން މިނިސްޓަރު ޓާރޯ ކޯނޯ ރާއްޖެއަށް ވަޑައިގެންނެވި ފަހުން، އެ ގައުމުގެ ސަރުކާރުގެ އެންމެ އިސް ފެންވަރުގެ އޮފިޝަލަކު ރާއްޖެއަށް ރަސްމީ ދަތުރެއް ކުރައްވާ ފުރަތަމަ ފަހަރެވެ. ޖަޕާނަކީ ރާއްޖެއަށް އަބަދުވެސް އެކި ގޮތްގޮތުން އެހީވަމުން އަންނަ، ރާއްޖެއާ ވަރަށް ގާތް ގުޅުމެއް ބާއްވާ ގައުމެކެވެ. އެންމެ ފުރަތަމަ މި ދެގައުމުގެ ދެމެދު ހާރިޖީ ގުޅުން ގާއިމުކުރީ ނޮވެމްބަރު 1967 ގައެވެ.