ޖާބިރުގެ ޓިކެޓް ގާނުނީ ވަކީލު ނަސީރަށް ދީފި

ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ކާށިދޫ ދާއިރާގެ އެމްޑީޕީ ޓިކެޓު ގާނޫނީ ވަކީލު އަބްދުﷲ ނަސީރަށް ދޭން އެ ޕާޓީން މިއަދު ނިންމައިފި އެވެ. އެ ޕަޓީން މިމަހުގެ 3 ވަނަ ދުވަހު ބޭއްވި ޕްރައިމަރީގައި އެ ދާއިރާގެ ޓިކެޓު ކާމިޔާބު ކުރެއްވި މިހާރު ވެސް އެ ދާއިރާގެ މެމްބަރު މަޝްހޫރު ވިޔަފާރިވެރިޔާ އަބްދުﷲ ޖަބިރު، އަހްލާގީ މައްސަލައަކާއި ގުޅިގެން އެމްޑީޕީން ވަކިކުރުމަށް ފަހު، އޭނާގެ އަތުން ޓިކެޓް މިހާރު ވަނީ އަތުލާފައެވެ. އަދި އެ މައްސަލަ އޭނާ އޮތީ އެމްޑީޕީގައި އިސްތިއުނާފު ވެސް ކޮށްފައެވެ. ޖާބިރުގެ ޓިކެޓް އެމްޑީޕީން ދިން ނަސީރަކީ އެމްޑީޕީގެ މަޖިލިސް ޕްރައިމަރީގައި ހުޅުމާލެ އުތުރު ދާއިރާ އަށް ވާދަކުރައްވައި ބަލިވި ކެންޑިޑޭޓެކެވެ. އެގޮތުން، ނަސީރުގެ މައްޗަށް އެ ދާއިރާގައި ކާމިޔާބު ހޯއްދެވީ އެމްޑީޕީގެ ސަރުކާރުގައި އާރުޑީސީގެ މެނޭޖިން ޑިރެކްޓަރުކަން ކުރެއްވި މޫސާ އަލިމަނިކު (މޫކޭ) އެވެ. މޫކޭ 70 ވޯޓު ހޯއްދެވިއިރު ނަސީރަށް ލިބިވަޑައިގަތީ 66 ވޯޓެވެ. ނަސީރަކީ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ރައީސް އޮފީހުގެ އަންޑަ ސެކްރެޓަރީ އެވެ. އޭނަ ކުރިން ސަރުކާރުގެ ބައެއް ކުންފުނިތަކުގެ ބޯޑް މެންބަރުކަން ވެސް ކުރައްވާފައިވެ އެވެ. ޖާބިރު ވަނީ ޓިކެޓް އަތުލުމުން މަޖިލިސް އިންތިހާބުގައި އަމިއްލަ ގޮތުން ވާދަކުރައްވާނެ ކަމަށް ވިދާޅުވެފައެވެ.

މަޖިލިސް އިންތިހާބަށް ކެންޑިޑޭޓުންގެ ފޯމު ބަލައިގަންނަން އިލެކްޝަންސް ކޮމިޝަނުން ކަނޑައަޅާފައިވާ ސުންގަޑިއަކީ އަންނަ އަންގާރަ ދުވަހުގެ ހަވީރު 4:00 އެވެ.

އަންނަ މަހުގެ 17 ވަނަ ދުވަހު މަޖިލިސް އިންތިހާބު ބޭއްވުމަށް އީސީން ނިންމި ނަމަވެސް އޮއްޔެ މަޖިލީހުގައި ވަނީ އިންތިހާބު ރޯދަފަހަށް ފަސްކުރުމަށް ނިންމާފައެވެ. ނަމަވެސް އެ ނިންމުމަށް އަމަލު ކުރެވޭނީ ރައީސުލްޖުމްހޫރިއްޔާ އެ ބިލް ތަސްދީގު ކުރެއްވުމުންނެވެ.