އިއްޔެ އެކަނިވެސް މާލޭ މަގުމަތިން 19 ޓަނު ކުނި ނަގައިފި

އިއްޔެ އާއި ރޭ އެކަނިވެސް މާލެ މަގުމަތިން 19 ޓަނުގެ ކުނި ނަގާފައިވާ ކަމަށް މާލެ ސިޓީ ކައުުންސިލުން ބުނެފިއެވެ. ސިޓީ ކައުންސިލުން ބުނީ 1.5 ޓަނުގެ 10 ޕިކަޕާއި 350 ކިލޯގެ 11 ޕިކަޕުގެ ކުނި މާލޭ މަގުމަތިން އިއްޔެ ނެގުނު ކަމަށެވެ. މާލެ ސިޓީގެ މަގުމައްޗަށް ކުނި އަޅާ މީހުން ހޯދައި އެމީހުން ލައްވާ ކުނި ނެގުމުގެ މަސައްކަތް ކުރިއަށްދާ ކަމަށް ފުލުހުން ވެސް ވަނީ ބުނެފައެވެ. ސިޓީ ކައުންސިލުން ބުނި ގޮތުގައި އިއްޔެ ވެސް ޕޭވްމަންޓު މަތީގައި ކުނި ބަހައްޓައިގެން ފަސް މީހަކު ޖޫރިމަނާކޮށްފައިވެއެވެ.

ރޯދައަށް ގެތަށް ސާފުކޮށް ބާ މުދާ މަގުތަކަށް އެއްކޮށްކޮށް މާލޭގެ ހުރިހާ ހިސާބެއްގައި ވެސް ގިނަ ސަރަހައްދުތަކެއް ވަނީ ވަރަށް ބޮޑަށް ގޮނޑުކޮށްފައެވެ. ކުނިގިނަވެ ވެމްކޯއިން ހިލޭ ކުނި އުކުމުގެ ޕްރޮގްރާމެއް ވެސް ހިންގިއެވެ. މާލޭގެ މަގުތަކުގެ ކުނި ނެގުމަކީ މިހާރު މާލެ ސިޓީ ކައުންސިލުން ބަލަހައްޓަމުންދާ ކަމެކެވެ.

މާލެ އާއި ވިލިމާލޭގެ މަގުތަކާއި ޕާކު ތަކާއި އާންމުތަންތަނާއި ބަނދަރުތަކާއި ވިޔަފާރި ސަރަހައްދުތަކަށް ކުނި އެޅުމަކީ މަނާ ކަމެކެވެ. އެފަދަ ތަންތަނަށް ކުނި އަޅާ ނަމަ ކައުންސިލުން ޕޮލިހަށް މައްސަލަ ހުށަހަޅަން ޖެހެއެވެ.