ރާއްޖޭގެ އިގްތިސާދުގެ ވާހަކަ ދެއްކުމުގެ އެއްވެސް ހައްގެއް އެމްޑީޕީގެ ސަރުކާރުގެ ފިނޭންސް މިނިސްޓަރުކަން ކުރެއްވި އިބްރާހިމް އަމީރު އަށް ނޯންނާނެ ކަމަށް އިކޮނޮމިކް މިނިސްޓަރ މުޙައްމަދު ސައީދު ވިދާޅުވެއްޖެ އެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އިކޮނޮމިކް މިނިސްޓަރ ސައީދު ވިދާޅުވީ ރާއްޖެ ދަރުވާލުމުގެ އަސްލު މޭސްތިރިއަކީ ރައީސް އިބްރާހީމް މުހައްމަދު ސޯލިހުގައި ފިނޭންސް މިނިސްޓަރުކަން ކުރެއްވި އިބްރާހީމް އަމީރުކަމަށާއި، އެހެންކަމުން ރާއްޖޭގެ އިގްތިސާދީ ހާލަތާ ގުޅޭގޮތުން އެއްވެސް ވާހަކައެއް ދެއްކުމުގެ ހައްގު އަމީރު އަށް ނޯންނާނެ ކަމަށެވެ.
އަދި މިނިސްޓަރު ސައީދު ވިދަޅުވީ ރާއްޖެ މިހިސާބަށް ވައްޓާލާފައި އެއޮތީ އަމީރުގެ ޒިންމާގެ ދަށުން ކަމަށާއި، ދެން ލައިގެން ހުރި ގަމީސް އަނެއް ފަރާތަށް ބަދަލުކުރެއްވުމަކުން އަމީރު އަކީ އިގްތިސާދުގެ ވާހަކަދައްކަން ރަނގަޅު މީހަކަށް ނުވާނެ ކަމަށެވެ.
މީގެ އިތުރުން މިނިސްޓަރ ސައީދު ވިދާޅުވީޯ ފައިސާ ޗާޕުކުރީމަ ޑޮލަރުގެ އަގު އަރައި ދިވެހި ރުފިޔާ އަގު އަރާނެކަމަށް އިލްޔާސް ލަބީބުވެސް ރައްޔިތުންގެ މަޖިލީހުގައި އޭރު ވިދާޅުވަމުން ގެންދެވި ކަމަށާއި އަދި އެމްޑީޕީ ސަރުކާރުން ފައިސާ ޗާޕުކުރަމުން ދިޔައިރު، އެކަމުގެ ނުރައްކަލާ ބެހޭގޮތުން އެމްއެމްއޭގެ އޭރުގެ ގަވަރުނަރު އަލީ ހާޝިމްވެސް ދިޔައީ އަމީރު އާއި ސްވާލުކުރައްވަމުން ކަމަށްވެސް މިނިސްޓަރު ސައީދު ވިދާޅުވި އެވެ.
