ޑީއެންއާރ ގެ ވެރިން އެތަނުގެ ތެރޭގައި ފޯމު ފުރިކަމަށް އިޢުތިރާފުވެފައިވާތީ، ޕީއެންސީން އިލެކްޝަންސް އަށް ހުށަހެޅި ފޯމުތައް ބާތިލްކުރަން ޖެހޭނެ ކަމަށް އެމްޑީޕީގެ ޗެއާޕާޗަން ފައްޔާޒް އިސްމާއިލް ވިދާޅުވެއްޖެއެވެ.
މިއަދު ޑީއެންއާރުން ނޫސްވެރިން އެތަނަށް ގެންގޮސް އެތަނުގެ މަސައްކަތްތައް ހިނގަމުންދާ ގޮތް ދައްކާލުމަށް ބޭއްވި ބައްދަލުވުމަށް އިޝާރާތްކުރައްވައި އެކްސްގައި ކުރެއްވި ޕޯސްޓެއްގައި ފައްޔާޒު ވިދާޅުވީ ނޫސްވެރިން ކުރި ސުވާލުތަކަށް ޖަވާބު ނުދެއްވައި، ހޯމް މިނިސްޓްރީގެ އިސްވެރިން ފިލި ނަމަވެސް މިކަމުގެ ހަގީގަތް މިއޮތީ ހާމަވެފައި ކަމަށާއި، އެގޮތުން ޕީއެންސީއަށް ވަގު ފޯމު ފުރީ ރައްޔިތުންގެ ޒާތީ މައުލޫމާތު ރައްކާކުރެވިފައިވާ ދައުލަތުގެ މުއައްސަސާއެއްގެ ތެރޭގައިކަމަށާއި ދައުލަތުގެ މުދާ ބޭނުންކޮށްގެން، އެ ތަނުގެ މުވައްޒަފުން ކަމަށެވެ.
ރައްޔިތުންގެ ޒާތީ މައުލޫމާތު ރައްކާކުރެވިފައިވާ އިދާރާގެ ތެރޭގައި ޕީއެންސީއިން އެ މައުލޫމާތު ވަގަށް ނަގައިގެން، ވަގު ފޯމު ފުރާ މަންޒަރު ހިމެނޭ ފޮޓޯތަކެއް ލީކުވެ، އެ ކަން ކުރި ކަމަށް ޑީއެންއާރުގެ ވެރިން އިއުތިރާފުވެފައިވާއިރު ދައުލަތުގެ ބަޖެޓުން ވައްކަން ކުރުމަށް ރާވައިގެން އެ… https://t.co/T1LbopXq6h
— Fayyaz Ismail (@faya_i) January 21, 2025
އަދި އިތުރަށް ފައްޔާޒް ގެ ޕޯސްޓްގައި ވިދާޅުވެފައިވަނީ ޑީއެންއާރުގެ ވެރިން މި ކުށަށް އިއުތިރާފުވެފައިވާތީ މައްސަލަ ބަލައި އިދާރާތަކުން ފިޔަވަޅު އަޅަން ޖެހޭ ކަމަށާއި ޕީއެންސީ އިން އީސީއަށް މިދިޔަ މުއްދަތުގައި ހުށަހެޅި ފޯމުތައް ބާތިލުކުރަން ޖެހޭ ކަމަށްވެސް ވިދާޅުވެފައި ވެއެވެ.
