"ހުރަވީ" ގެ ބަދަލުގައި އިންޑިއާއިން ދިން އުޅަނދު ކޮމިޝަންކޮށްފި

އެމްއެންޑީއެފް ކޯސްޓްގާރޑު "ޝިޕް ހުރަވީ" ގެ ބަދަލުގައި އިންޑިއާ ސަރުކާރުން ދިން އުޅަނދު ރަސްމީކޮށް ރާއްޖެއާއި ހަވާލުކޮށް ކޮމިޝަންކޮށްފިއެވެ. މި އުޅަނދު އެމްއެންޑީއެފަށް ހަދިޔާކުރުމާއެކު ކޯސްޓްގާރޑު ޝިޕް ހުރަވީ ވަނީ ޑީކޮމިޝަން ވެފައެވެ. އިންޑިއާ ސަރުކާރުން ދިވެހިރާއްޖެއަށް ހަދިޔާކުރި އޯފްޝޯ ޕެޓްރޯލް ވެސަލް،  ކޮމިޝަން ކުރުމަށް މިއަދު ބޭއްވި ރަސްމިއްޔާތު ޝަރަފްވެރި ކޮށްދެއްވައި އެއުޅަނދު ކޮމިޝަން ކޮށްދެއްވީ ސިފައިންގެ އެންމެ މަތީވެރިޔާ، ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހުއެވެ. އެރަސްމިއްޔާތުގައި އިންޑިއާގެ ޑިފެންސް މިނިސްޓަރާއި ރާއްޖޭގެ ޑިފެންސް މިނިސްޓަރުގެ އިތުރުން ސިފައިންގެ އިސްބޭފުޅުންނާއި ވަޒީރުންގެ މަޖިލީހުގެ މެމްބަރުން ވަނީ ބައިވެރިވެ ވަޑައިގެންފައެވެ. އެރަސްމިއްޔާތު އޮތީ މިއަދު ހެނދުނު ހުޅުމާލޭގައި އެމްއެންޑީއެފް ކޯސްޓްގާޑުގެ އުޅަނދުފަހަރު ބަނދަރުކުރާ ސަރަޙައްދުގައެވެ. މިއަދު ހިދުމަތަށް ނެރުނުު އެ އުޅަނދުގެ ނަމަކީ "ސީޖީއެސް ހުރަވީ" އެވެ. މިއަދުގެ ރަސްމިއްޔާތުގައި "ސީޖީއެސް ހުރަވީ" ގެ އިތުރުން  އިންޑިއާ އިން ދިން ލޭންޑިން ކްރާފްޓް ދިވެހި ސަރުކާރާއި ހަވާލުކުރެއްވުމުގެ ގޮތުން އެ ދެ އުޅަނދުގެ މޮޑެލް، ޑިފެންސް މިނިސްޓަރު މާރިޔާ އަހްމަދު އަށް އިންޑިއާގެ ޑިފެންސް މިނިސްޓަރު ރަޖްނަތު ސިންގް އެރުވިއެވެ. އިންޑިއާ ސަރުކާރުން މި ހަދިޔާކުރި އުޅަނދުތަކުގެ ސަބަބުން އެމްއެންޑީއެފް ކޯސްޓްގާޑުގެ ގާބިލްކަން އިތުރުވެ ދިވެހި ރާއްޖޭގެ ދިފާއީ އަދި ސަލާމަތާއި ރައްކާތެރިކަން  ދެމެހެއްޓުމާ ކަނޑުގެ ސަރަޙައްދުތައް ބެލެހެއްޓުމަށް ކުރާމަސައްކަތް އިތުރަށް ހަރުދަނާވެގެންދާނެކަމަށް ސަރުކާރުން ބުންޏެެވެ.