ހުޅުމާލޭގައި އަނެއްކާވެސް ނުރައްކާތެރި އެކްސިޑެންޓެއް، އަނިޔާވި ޒުވާނާގެ ހާލު ސީރިއަސް

ހުޅުމާލެ ދެވަނަ ފިޔަވަހީގައި ގައި އެމްޓީސީސީގެ ބަހަކާއި ސައިކަލެއް ޖެހި އެކްސިޑެންޓެއް ހިގައި ޒުވާނަކަށް ސީރިއަސް އަނިޔާތަކެއް ލިބިއްޖެއެވެ. ފުލުހުން ބުނީ މިއަދު ހެނދުނު 8:51 ހާއިރު، އެކަމާ ގުޅިގެން ދެވަނަ ފިޔަވަހީގެ ގުލްހަޒާރުމާހިންގުމާއި ދުނބުރިގަސް މަގު ގުޅުނު ކަންމަތިން ބަހަކާއި ސައިކަލެއް ޖެހި އެކްސިޑެންޓް ހިނގާފައިވާ ކަމުގެ މައުލޫމާތު ލިބިފައިވާ ކަމަށެވެ. އެކްސިޑެންޓްގައި އަނިޔާވި 19 އަހަރުގެ ޒުވާނާ އަށް ވަނީ ހުޅުމާލެ ހޮސްޕިޓަލަށް ގެންގޮސް ފަރުވާދޭން ފަށާފައެވެ. ނަމަވެސް ޒުވާނާ އަށް ލިބިފައިވާ ސީރިއަސް އަނިޔާތަކުގެ ސަބަބުން އިތުރު ފަރުވާއަށް އޭޑީކޭ ހޮސްޕިޓަލަށް ގެންދިއުމުގެ މަސައްކަތް ކުރަމުން އަންނަ ކަމަށް މައުލޫމާތު ލިބިފައިވެއެވެ. އެ މީހާ އަށް ލިބުނު އަނިޔާގެ ތަފުސީލެއް އަދި ލިބިފައެއް ނުވެއެވެ. އާންމުވެފައިވާ ފޮޓޯތަކުން ފެންނަ ގޮތުގައި ބަހުގެ މެދުގައި ސައިކަލް ޖެހިފައިވާއިރު އެ ދިމާލުން ބަހުގެ ބިއްލޫރިގަނޑު ވެސް ވަނީ ފުނޑުފުނޑުވެފައެވެ. ފަހަކަށް އައިސް ހުޅުމާލޭގެ ދެވަނަ ފިޔަވައްސާއި ސިނަމާލެ ބްރިޖުގައި ނުރައްކާތެރި ގިނަ އެކްސިޑެންޓްތައް ހިނގައި، ބައެއް މީހުންގެ ފުރާނަ ވެސް ގެއްލިފައިވެއެވެ. މިފަދަ ނުރައްކާތެރި ހާދިސާތަކުން ރައްކާތެރިވުމަށް އާބަންކޯއިން ވަނީ ދެވަނަ ފިޔަވަހީގައި ޓްރެފިކް ލައިޓްތަކެއް ހަރުކޮށްފައެވެ.