ހުޅުމާލެ ފޭސް 2 ގައި މިރޭ ހަވާ އަރުވަނީ

ހުޅުމާލޭ ދެވަނަ ފިޔަވައްސާ ދިމާލުން މިރޭ ހަވާ އަރުވާނެ ކަމަށް އެމްއެންޑީއެފް އިން ބުނެފިއެވެ. އެމްއެންޑީއެފް އިން ކުރި ޓްވީޓެއްގައި ބުނީ މިރޭ 2200 ގައި، ހުޅުމާލެ ދެވަނަ ފިޔަވަހީގެ ފަރުކޮޅުފުއްޓާ ދިމާ ބޭރު މޫދު ސަރަހައްދުގައި ހަވާ އެރުވުމަށް ވަނީ ހަމަޖެހިފައި ކަމަށެވެ. ވިޔަފާރި އުސޫލުން ޕްރައިވެޓް އިވެންޓަކަށް ސިފައިންގެ ކޯޕަރޭޓިވް (ސިފްކޯ) އިން ކުރިޔަށްގެންދާ މި ހަރަކާތް ކުރިއަށް ދާނީ 3 މިނެޓެއްހާއިރަށް ކަމަށް ވެސް އެމްއެންޑީއެފް އިން ބުނެފައިވެއެވެ. [embed]https://twitter.com/MNDF_Official/status/1672135022978166784?s=20[/embed] މިރޭ ހަވާ އަރުވަނީ ޕްރައިވެޓް އިވެންޓަކަށް ކަމަށް ބުނެ، އިތުރު އެހެން މައުލޫމާތެއް އެމްއެންޑީއެފުން ދީފައެއް ނުވެއެވެ. ހަވާ އެރުވުމަށް އާއްމު ގޮތެއްގައި މިނެޓަކަށް 1000 ޑޮލަރު (ގާތްގަނޑަކަށް -/15000 ރުފިޔާ) ސިފްކޯ އަށް ދައްކަން ޖެހެއެވެ. އެހެންކަމުން މިރޭ ހަވާ އެރުވުމަށް ބައިލައްކައެއްގައި ރުފިޔާ ހޭދަކުރާނެ ކަމަށް ބެލެވެއެވެ.