ހިޔާ ޓަވަރެއްގައި ކުޑަކުއްޖަކަށް ގުރޫޕަކުން އަނިޔާކުރި މައްސަލައެއް ބަލަން ފަށައިފި

ހުޅުމާލެ ދެވަނަ ފިޔަވަހީގައި ހުންނަ ހިޔާ ފްލެޓެއްގެ ކޮރިޑޯގައި ކުޑަ ކުއްޖަކަށް އަނިޔާކުރި މައްސަލައެއް ފުލުހުން ތަހުގީގު ކުރަން ފަށައިފިއެވެ. ފުލުހުން ބުނީ ހިޔާ ފްލެޓްގެ ކޮރިޑޯއެއްގައި މީހަކަށް އަނިޔާ ކުރާ ވީޑިއޯ މި މަހުގެ 19 ވަނަ ދުވަހު ފުލުހުންގެ ސަމާލުކަމަށް އައިސްފައިވާ ކަމަށެވެ. މި މައްސަލަ ފުލުހުން ތަހުގީގު ކުރަމުންދާއިރު، އެ ވީޑިއޯގައި އެއީ ކޮން ބައެއްކަން މިހާތަނަށް ފުލުހުން ކުރި މަސައްކަތުން ދެނެގަނެވިފައި ނުވާ ކަމަށް ފުލުހުން ބުންޏެވެ. https://twitter.com/MvCrisis/status/1806220834966790643 ފުލުހުން ވަނީ އެ ވީޑިއޯއިން ފެންނަ ފަރާތްތަކާ ގުޅޭ އެއްވެސް މައުލޫމާތެއް ލިބިފައިވާނަމަ ފުލުހުންނާއި ހިއްސާ ކޮށްދިނުމަށް ވެސް އެދިފައެވެ. ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަނީ ތިން މީހަކު ހިމެނޭ ގުރޫޕަކުން ފިރިހެން ކުއްޖަކަށް ވަރަށް ބޮޑަށް އަނިޔާކުރާ މަންޒަރެވެ. އެތަނުން އެކަކު ވަނީ އެ ކުއްޖާއަށް އަނިޔާވާ ގޮތަށް ކަރުގައި އަތްއަޅުވައި ފައިން ތަޅާ އަނިޔާކޮށްފައެވެ. މި މާރާމާރީގައި އިސްކޮށް އުޅުނީ އެކަކެވެ.