ހިޔާ ފްލެޓްތަކުގެ ކުއްްޔަށް ލުޔެއް ދިނީ އިންތިހާބަށް ނޫންކަމަށް އަކްރަމް ވިދާޅުވެއްޖެ

ހިޔާ ފްލެޓްތަކުގެ ކުއްޔަށް ލުޔެއް ދިނީ މި އަހަރު އޮންނަ ރިޔާސީ އިންތިހާބާ ދިމާކޮށް ނޫން ކަމަށް ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ. މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން އަކްރަމް ވިދާޅުވީ، ސަރުކާރުން އެ ބަދަލު ގެނައީ ރިޔާސީ އިންތިހާބާ ދިމާކޮށް ނޫން ކަމަށެވެ. އަކްރަމް ވިދާޅުވީ، ފާއިތުވި ތިން އަހަރުގެ ތެރޭގައި އެކި މަރުހަލާތަކުގައި ހިޔާގެ ކުއްޔަށް ލުއި ދީފައިވާނެ ކަމަށެވެ. އަކުރަމް ވިދާޅުވީ ކުލި ކުޑަކުރީ ނޫން ކަމަށާއި، އަބަދުވެސް ބުނަމުން ދަނީ ކުއްޔަށް އެއްވެސް ބަދަލެއް ގެނެވެން ނެތް ކަމަށެވެ. އެގޮތުން ކުއްޔަށް ލުޔެއް ދިނީ 7 އަހަރަށް 5،300 ރުފިޔާ ދައްކާ ގޮތަށް ހަދާފައި އިތުރަށް ދެ އަހަރު ދިނީ ކަމަށާއި، އެއީ ކޮންމެހެން އިންތިހާބާ ގުޅުންހުރި ކަމެއްް ނޫން ކަމަށް ވެސް އަކްރަމް ވިދާޅުވިއެވެ. ސަރުކާރުން މިއަދު ވަނީ، ހިޔާގެ ފްލެޓެއްގެ އަގު 5،300ރ. އަށް ހަތް އަހަރު ދުވަހަށް ކުޑަކޮށް، އަދާކުރަންޖެހޭ މުއްދަތު 25 އަހަރުން 27 އަހަރަށް އިތުރުކޮށްފައެވެ.