ހިޔާއިން ގެންދާ ކުދިންގެ ބެލެނިވެރިކަން 6 މަސް ތެރޭގައި ގާނޫނީ ގޮތުން ބަދަލުކުރަން ޖެހޭ

ދައުލަތުގެ ބެލުމުގެ ދަށަށް ގެނެވޭ ކުދިން ރީ-އިންޓެގްރޭޓް ކުރުމުގެ ގަވައިދުގެ ދަށުން، 6 މަސް ދުވަހުގެ ތެރޭގައި ފޮސްޓާ ބެލެނިވެރިޔާއަށް ގާނޫނީ ގޮތުން ބެލެނިވެރިކަން ބަދަކުރަންޖެހޭ ގޮތް ހަދައިފިއެވެ. މިދިޔަ ބުރާށްފަތި ދުވަހު އާންމުކުރި، "ދައުލަތުގެ ބެލުމުގެ ދަށަށް ގެނެވޭ ކުދިން ރީއިންޓެގްރޭޓް ކުރުމުގެ ގަވައިދަށް" ގެނައި އިސްލާހުގައިވަނީ ކުޑަކުދިންގެ ހައްގުތައް ރައްކާތެރިކުރުމުގެ ގާނޫނަށް އަމަލުކުރަން ފެށުމުގެ ކުރިން ދައުލަތުގެ ބެލުމުގެ ދަށުން ފޮސްޓާ ބެލެނިވެރިޔާއާ ހަވާލުކޮށް، މިހާތަނަށް ގާނޫނީ ބެލެނިވެރިކަން ފޮސްޓާ ބެލެނިވެރިންނާ ހަވާލުކޮށްފައިނުވާ ކުދިންގެ ގާނޫނީ ބެލެނިވެރިކަން ފޮސްޓާ ބެލެނިވެރިޔާއަށް ހަވާލުކުރުމަށް 6 މަސްދުވަހުގެ ތެރޭގައި ޝަރުއީ ކޯޓަށް ހުށަހަޅަން ޖެހޭނެ ކަމަށެވެ. ފޮސްޓާ ބެލެނިވެރިންނާ ހަވާލުކޮށްފައިނުވާ ކުދިންގެ ގާނޫނީ ބެލެނިވެރިކަން ފޮސްޓާ ބެލެނިވެރިޔާއަށް ހަވާލުކުރުމަށް ޝަރުއީ ކޯޓަށް ހުށަހަޅާއިރު ކުއްޖާއާއި ފޮސްޓާ ބެލެނިވެރިންގެ މިހާރުގެ ހާލަތު އަންގައިދޭ އެސެސްމަންޓް ރިޕޯޓެއް ތައްޔާރު ކުރަން ޖެހޭނެ ކަމަށް ވެސް އެ އިސްލާހުގައިވެއެވެ. މި އިސްލާހާއެކު ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުއަށް އަމަލުކުރުމަށް ފެށުމުގެ ކުރިން ކޯޓު މެދުވެރިކޮށް ގާނޫނީ ބެލެނިވެރިކަން ފޮސްޓާ ބެލެނިވެރިޔާއަށް ބަދަލުކުރެވިފައިވާ ކުދިންގެ މައްސަލަތައް އަލުން ކޯޓަށް ހުށަހަޅަން ނުޖެހޭނެ ކަމަށް ޖެންޑާމިނިސްޓްރީއިން ބުނެފައިވެއެވެ.