އެޗްޑީސީގެ ޗެއާމަނަކަށް ޒުހޫރު ހަމަޖައްސައިފި

ހައުސިން ޑިވޮލަޕްމެންޓް ކޯޕަރޭޝަން (އެޗްޑީސީ)ގެ ޗެއާމަނަކަށް ރައީސް ޔާމިނު ސަރުކާރުގައި ސަރުކާރުގެ އިސް މަގާމުތަކެއް ފުރުއްވި އަހުމަދު ޒުހޫރު ހަމަޖައްސަވައިފިއެވެ. އެޗްޑީސީގެ ޗެއާމަންގެ މަގާމަށް އަހުމަދު ޒުހޫރު އިއްޔެ ހަމަޖައްސަވާފައިވާއިރު، މިކަން ސަރުކާރުގެ ކުންފުނިތަކުގެ ބަލަދުވެރި ފަރާތް ޕްރައިވަޓައިޒޭޝަން އެންޑް ކޯޕްރަޓައިޒޭޝަން ބޯޑުންވެސް ވަނީ ޔަގީންކޮށްދީފައެވެ. އެޗްޑީސީގެ ޗެއާމަންގެ މަގާމަށް ޒުހޫރު އައްޔަނުކޮށްފައިވާއިރު، އޭނާއަކީ ރައީސް ޔާމީނު ސަރުކާރުގައި އެންމެ ގިނަ އިސް މަގާމުތައް ފުރުއްވި އެއް ބޭފުޅާއެވެ. މިގޮތުން ޒުހޫރު ވަނީ ކޮމިޝަނާ ޖެނެރަލް އޮފް ކަސްޓަމްސްގެ މަގާމާއި، ސްޓެލްކޯގެ މެނޭޖިންގ ޑިރެކްޓަރުކަމާއި، ޒުވާނުންގެ މިނިސްޓަރުކަމުގެ އިތުރުން ހެލްތު މިނިސްޓަރުކަމުގެ މަގާމުވެސް ފުރުއްވާފައެވެ. އަދި ހޯމް މިނިސްޓަރު ކަމާއި ރައީސް އޮފީހުގެ މިނިސްޓަރުކަންވެސް ކުރެއްވިއެވެ. ޒުހޫރު ވަނީ މެރިޓައިމް އެފެއާޒްގެ އިތުރުން، އެކައުންޓިން އެންޑް ފައިނޭޝަލް މެނޭޖްމަންޓާއި،  ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓާސް ހައްދަވާފައެވެ.