ހަށިވިއްކި މައްސަލައިގައި ހައްޔަރުކުރި ދެ އަންހެނުންގެ ބަންދަށް 15 ދުވަސް ޖަހައިފި

މާލޭގެ ސެލޫނެއްގައި ހަށިވިއްކި މައްސަލައެއްގައި ހައްޔަރުކުރި ދެ އަންހެނުންގެ ބަންދަށް ކްރިމިނަލް ކޯޓުން 15 ދުވަހުގެ މުއްދަތު ޖަހައިފިއެވެ. ހަށި ވިއްކި ކަމުގެ މައްސަލާގައި ހައްޔަރު ކޮށްފައިވަނީ ތައިލެންޑުގެ އުމުރުން 22 އަހަރުގެ އަންހެނަކާއި އުމުރުން 39 އަހަރުގެ އަންހެނެކެވެ. ކްރިމިނަލް ކޯޓުގެ އަމުރުގައިވާ ގޮތުން އެ ދެ މީހުން ވެސް ހަށިވިއްކި ކަމަށް ބެލެވޭ މިންވަރަށް ހެކި ހުށަހަޅާފައި ވެއެވެ. މިގޮތުން ސީނަށް ދިޔަ ފުލުހުންގެ ބަޔާންތަކާއި އެ އަންހެން މީހާ އެކި މީހުންނާއެކު ކޮށްފައިވާ ފޯނު މުއާމަލާތްތަކުގެ ސްކްރީންޝޮޓްތައް ލިބިފައިވާ ކަމަށް ވެސް ކޯޓު އަމުރުގައި ވަނީ ބުނެފައެވެ. އަދި އެ ހެކިތަކަށް ބަލާއިރު އެ ދެ އަންހެނުން މަސައްކަތްކުރާ ސެލޫންގައި ހަށިވިއްކުމުގެ އަމަލު ހިންގާފައިވާކަން އެނގޭނެ ހެކިތައް ހުށަހަޅާފައިވާ ކަމަށް ވެސް އަމުރުގައި ބަޔާން ކޮށްފައިވެއެވެ. މީގެ އިތުރުން އެ ދެ އަންހެނުން މަސައްކަތްކުރާ ސެލޫން ތެރެ ފުލުހުން ބަލާ ފާސްކުރުމުން ބަރަހަނާ ހާލުގައި ތިބި ދެމީހުންނާއި ޖިންސީ އަމަލު ހިންގުމަށް ބޭނުންކުރާ އާލާތްތައް އެތަނުން ފެނިފައިވާ ކަމަށް ކޯޓު އަމުރުގައި ވަނީ ބުނެފައެވެ.