ހަށިވިއްކުމުގެ ތުހުމަތުގައި ހައްޔަރުކުރި 13 މީހުންގެ ތެރެއިން އެކަކު ދޫކޮށްލައިފި

ފުޅާ ދާއިރާއެއްގައި ހަށިވިއްކަމުން ދިޔަކަމުގެ ތުހުމަތުގައި ހައްޔަރު ކުރި 13 މީހުންގެ ތެރެއިން އެކަކު ދޫކޮށްލައިފި އެވެ. އެ ތުހުމަތުގައި ހައްޔަރުކުރި މީހުންގެ ތެރޭގައި ހިމެނެނީ ބަންގްލަދޭޝްގެ 8 ފިރިހެނަކާއި، ބަންގްލަދޭޝް އަންހެނެއްގެ އިތުރުން، ތައިލެންޑްގެ ހަތަރު އަންހެނުންނެވެ. "މިނިވަން" އަށް މައުލޫމާތު ދެމުން ފުލުހުންގެ މީޑިއާ އޮފިޝަލަކު އޭރު ވިދާޅުވީ، މި 13 މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ގެންދިއުމުން 15 ދުވަހުގެ މުއްދަތު ޖަހާފައިވާ ކަމަށެވެ. ނަމަވެސް މި 13 މީހުންގެ 15 ދުވަހުގެ މުއަދަތު ހަމަވުމުން މިދިޔަ އަންގާރަ ދުވަހު ކްރިމިނަލް ކޯޓަށް ގެންދިއުމުން ވަނީ، އޭގެ ތެރެއިން 9 މީހެއްގެ ބަންދަށް 30 ދުވަސް ޖަހާފައެވެ. އަދި ދެ މީހެއްގެ ބަންދަށް އިތުރު 15 ދުވަސް ޖަހާފައިވާ އިރު، އެކަކުގެ ބަންދަށް 10 ދުވަސް ވަނީ ޖަހާފައެވެ. މީގެ އިތުރުން އެ މައްސަލައިގެ ހައްޔަރުކުރި އެކަކު ކޯޓުން ވަނީ ދޫކޮށްލާފައެވެ. ފުލުހުން ބުނީ، މި 13 މީހުން ހައްޔަރު ކޮށްފައިވަނީ، ފުޅާ ދާއިރާއެއްގައި ހަށިވިއްކުމުގެ ވިޔަފާރި ކުރަމުންދާ ކަމަށް ލިބުނު އިންޓެލިޖެންސް މައުލޫމާތަކާ ގުޅިގެން ރާވައިގެން ހިންގާ ކްރިމިނަލް ނެޓްވޯކަކާ ދެކޮޅަށް ހިންގި އޮޕަރޭޝަނެއްގައި ކަމަށެވެ. ރާއްޖޭގައި ބިދޭސީން ފުޅާދާއިރާއެއްގައި އެކި ވިޔަފާރިތައް ކުރަމުންދާއިރު ގާނޫނާއި ގަވައިދާ ހިލާފް ގިނަކަންތައްތަކެއް ދަނީ ކުރަމުންނެވެ.