ހައްޖާޖީންނަށް އެހީތެރިވުމުގައި އަރބަންކޯ!

މި އަހަރު ރާއްޖެއިން ހައްޖަށްދާ މީހުންގެ ދަތުރުގައި އެހީތެރިވުމަށް އާރބަންކޯ އިން ދަތުރުވެރިން އެއާޕޯޓަށް އުފުލައިދޭން ފަށައިފިއެވެ. ހައްޖާޖީންނަށް އެހީތެރިވުމުގެ ގޮތުން މި މަހުގެ 11 ވަނަ ދުވަހުން ފެށިގެން 19 ވަނަ ދުވަހާ ހަމައަށް އެ ފަރާތްތަކުގެ ލަގެޖާއި، ދަތުރުވެރިން އެއާޕޯޓަށް ގެންގޮސްދިނުމުގެ ހިދުމަތް އާބަންކޯއިން ކުރަމުން ގެންދާނެ ކަމަށް އެ ކުންފުނިން ނެރުނު ނޫސް ބަޔާނެއްގައި ބުނެފައިވެއެވެ. އޭގެ އިތުރުން، އާރބަންކޯ އިން ބުނީ މޯލްޑިވްސް ހައްޖު ކޯޕަރޭޝަން، ސިސިލްފަރު ހައްޖު އެންޑް އުމްރާ ގްރޫޕް، އަލްމަނާސިކް އަދި އަލްހަރަމައިން ގެ ހައްޖުވެރިންނާއި ލަގެޖު އެއާޕޯޓަށް ގެންދިއުމަށް ވެސް އެ ކުންފުނިން އެއްބާރުލުން ދޭނެ ކަމަށެވެ. ހައްޖުގެ މާތް އަޅުކަމުގައި ބައިވެރިވާ ފަރާތްތަކަށް އެ ކުންފުނީގެ ފަރާތުން އެހީއެއްގެ ގޮތުގައި ދަތުރު ހަމަޖައްސައިދެވުމަކީ ކުންފުންޏަށް ލިބޭ ވަރަށް ބޮޑު އުފަލެއް ކަމަށް އާބަންކޯއިން ބުނެފައިވެއެވެ. އެގޮތުން ޖުމްލަ ތިން ދުވަހަކަށް ބަހާލައިގެން ހައްޖު ކޯޕަރޭޝަންގެ ހައްޖުވެރިން ގެންދަން ހަމަޖެހިފައިވާއިރު، އިއްޔެ ވަނީ 243 ހައްޖުވެރިން އެއާޕޯޓަށް އުފުލާދީފައެވެ. އަދި 16 ވަނަ ދުވަހާއި 19 ވަނަ ދުވަހު ވެސް 243 ހައްޖުވެރިން ގެންދިއުމަށް ވަނީ ހަމަޖެހިފައެވެ. އިއްޔެ ފުރާފައި ވަނީ މޯލްޑިވްސް ހައްޖު ކޯޕަރޭޝަން ލިމިޓެޑުގެ ފުރަތަމަ ގްރޫޕްގައި ހިމެނޭ 295 ހައްޖާޖީންނެވެ. މި ހައްޖާޖީން ފުރީ އިއްޔެ ހަވީރު އޮތް 15:10 ގެ ފްލައިޓުންނެވެ. މިއަހަރު ހައްޖަށް ފުރާ ދެވަނަ ގްރޫޕް ފުރަން ހަމަޖެހިފައިވަނީ މިއަދު 12:50 ގައެވެ.