ގައުމުގެ ސަލާމަތާއި މަސްލަހަތު ގެއްލޭނެ އެއްވެސް ކަމެއްގައި ޖޭޕީ ބައިވެރިވެގެން ނުވާނެ: ގާސިމް

ގައުމުގެ ސަލާމަތާއި މަސްލަހަތު ގެއްލޭނެ އެއްވެސް ކަމެއްގައި ޖުމްހޫރީ ޕާޓީ (ޖޭޕީ) ބައިވެރިވެގެން ނުވާނެކަމަށް އެ ޕާޓިގެ ލީޑަރު ގާސިމް އިބްރާހީމް ވިދާޅުވެއްޖެއެވެ. ގާސިމް މިހެން ވިދާޅުވީ މިހާރު ކުރިއަށްދާ އެޕާޓީގެ 157 ވަނަ ކައުންސިލް ބައްދަލުވުމުގައި ވާހަކަފުޅުދައްކަވަމުންނެވެ. އެ ޕާޓީއިން ބުނެފައިވާ ގޮތުގައި މި ބައްދަލުވުމަކީ، ޗާގޯސް މައްސަލާގައި މަޝްވަރާކޮށް ގޮތެއް ނިންމުމަށް ހާއްސަކޮށްފައިވާ ބައްދަލުވުމެކެވެ. ރާއްޖެ މޮރިޝަސް ކަނޑުއޮޅީގެ މައްސަލާގައި ސަރުކާރުގެ ނިންމުމާ މެދު ހިންހަމަނުޖެހުން ފާޅުކުރައްވާ ގާސިމް އިބްރާހީމް ވަނީ ތަކުރާރުކޮށް ވާހަކަފުޅުދައްކަވާފައެވެ. އެގޮތުން ގާސިމް ވިދާޅުވީ، ރާއްޖޭގެ ސަރަހައްދުން އެންމެ ކޮޑި އިންޗިއެއްވެސް ދިވެހީންނަށް ގެއްލޭ ގޮތަށް ނިންމާ އެއްވެސް ނިންމުމަކަށް ތާއީދެއް ނުކުރައްވާނެކަމަށެވެ. އަދި ސަރުކާރުގެ ނިންމުމަކީ ގަނޫނާ ހިލާފު ނިންމުމެއްކަމުގައި ދެކިވަޑައިގަންނަވާ ކަމަށް ވެސް ގާސިމް ވިދާޅުވެފައިވެއެވެ. މިއަދު ޖޭޕީ ކައުންސިލުގެ ހާއްސަ ބައްދަލުވުމެއް މިމައްސަލައާ ގުޅޭގޮތުން ބާއްވަމުންދާ އިރު މިއީ، ޖޭޕީ ކައުންސިލްގެ ބައްދަލުވުމެއް ޓިވީއިން ލައިވް ކުރާ ފުރަތަމަ ފަހަރުވެސް މެއެވެ.