ގައުމީ އިނާމާ ބެހޭ ކޮމިޓީގެ ޗެއާޕާސަނަކަށް ކަށިމާ ޝާކިރު

ގައުމީ އިނާމާބެހޭ ކޮމިޓީގެ ޗެއަރޕަރސަންގެ މަގާމަށް އަލްއުސްތާޛު ކަށިމާ އަހްމަދު ޝާކިރު އައްޔަންކުރައްވައިފިއެވެ. ރައީސް އޮފީހުން މިއަދު ބުނީ ރައީސް ޑރ. މުއިއްޒު، އެ މަގާމަށް ބޭފުޅަކު އައްޔަންކުރެއްވީ އެ މަގާމުގައި ހުންނެވި ނިޝާން އިއްޒުއްދީންގެ އިއްޒަތުގެ ވެރިޔާ އަނީސާ އަހްމަދު، ސިއްހީ ސަބަބުތަކަކަށްޓަކައި އިސްތިއުފާ ހުށަހެޅުއްވުމާ ގުޅިގެން ކަމަށެވެ. އަނީސާގެ އިސްތިއުފާ ގަބޫލުފުޅުކުރައްވައި ރައީސް ވަނީ ގައުމީ އިނާމާބެހޭ ކޮމިޓީގެ ޗެއާޕާސަންގެ މަގާމުގައި ތެދުވެރިކަމާއި އިހުލާސްތެރިކަމާ އެކު ދިގު މުއްދަތެއްގައި ކޮށްދެއްވި އަގުހުރި ހިދުމަތަށް ޝުކުރު އަދާކުރައްވައިފަ އެވެ. ގައުމީ އިނާމާ ބެހޭ ކޮމިޓީއަށް އަނީސާ އައްޔަންކުރެއްވީ 2014 ވަނަ އަހަރެވެ. އޭރު އޭނާ ކޮމިޓީގެ މެމްބަރެއްގެ ގޮތުގައި ހުންނެވުމަށްފަހު އެ ކޮމިޓީގެ ޗެއާޕާސަނަށް އައްޔަންކުރެއްވީ ޖެނުއަރީ 2018 ގައެވެ. ރައީސް އޮފީހުން ވަނީ ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީގެ ސްޓޭޓް މިނިސްޓަރަކަށް، ނިޝާން މުލީގޭ ޝަރަފުގެ އިއްޒަތުގެ ވެރިޔާ އިބްރާހިމް އިސްމާއިލް އައްޔަންކުރެއްވުމުން، އޭނާގެ ބަދަލުގައި ނިޝާން ދިޔަމިގިލީ ޝަރަފުގެ އިއްޒަތުގެ ވެރިޔާ ބަދުރުއްނަސީރު ގައުމީ އިނާމާ ބެހޭ ކޮމިޓީއަށް އައްޔަންކުރައްވައިފައެވެ. ބަދުރު ވަނީ ރާއްޖޭގެ ބްރޯޑްކާސްޓިންގެ ދާއިރާގައި 40 އަހަރަށް ވުރެ ގިނަ ދުވަހު ހިދުމަތްކުރައްވާފައެވެ.