ގާސިމްގެ އެޑްވައިޒަރަކަށް ނިހާން ހަމަޖައްސައިފި

ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ އެޑްވައިޒަރަކަށް ކުރީގެ މެމްބަރު އަހުމަދު ނިހާން ހުސެއިން މަނިކު ހަމަޖައްސައިފިއެވެ. ރައީސް ޔާމީންގެ ވެރިކަމުގައި ޕީޕީއެމްގެ ޕާލިމެންޓްރީ ގްރޫޕްގެ ލީޑަރަކަށް ހުންނެވި ނިހާން ޖުމްހޫރީ ޕާޓީއާ ގުޅުނީ ރައީސް ޔާމީންގެ ވެރިކަން ނިމުނު ފަހުންނެވެ. ޖުމްހޫރީ ޕާޓީއާ ގުޅުނު ނަމަވެސް ސިޔާސީ މައިދާނުގައި މާ ހަރަކާތްތެރިކޮށް ނިހާން އުޅުއްވާތަނެއް ނުފެނެއެވެ. ޤާސިމްގެ އެޑްވައިޒަރަކަށް ނިހާމް ހަމަޖެއްސީ ކުރިއަށް އޮތް ރިޔާސީ އިންތިހާބުގައި ޤާސިމް އިބްރާހިމް ވާދަކުރައްވާނެތޯ ނުވަތަ ނޫންތޯ ސުވާލު އުފެދިފައިވާ ދަނޑިވަޅެއްގައެވެ. ސިޔާސީ މަޝްރަހް ދިރާސާ ކުރާ ފަރާތްތަކުން ބުނާ ގޮތުން މިދަނޑިވަޅުގައި ނިހާން މި މަޤާމަށް ހަމަޖެއްސުމަކީ ކުރިއަށް އޮތް ރިޔާސީ އިންތިހާބުގައި ޤާސިމް ވާދަކުރައްވަފާނެ ކަމުގެ އިޝާރާތެކެވެ. ޤާސިމްގެ އެޑްވެެއިޒަރެއްގެ ގޮތުން ކުރީގެ މެމްބަރު އިލްހާމް އަހުމަދުވެސް ގެންދަވަނީ ހަރަކާތްތެރިވަމުން ނެވެ. https://twitter.com/JPSecretariat/status/1624055274959953926 ޖުމްހޫރީ ޕާޓީގެ ކޮންގްރެސް މިމަހު 23 ވަނަ ދުވަހު އޮންނައިރު ޕާޓީގެ ލީޑަރު ކަމުގެ މަޤާމް އުވާލާ ޕާޓީގެ ރައީސަށް ހުރިހާ ބާރުތަކެއް ދިނުމަށް އިސްލާހު ހުށައެޅުމަށް ވަނީ ނިންމާފައެވެ. އަދި ޕާޓީގެ ރައީސަށް ލަފާދޭން 5 އެޑްވައިޒަރުންނާއި 5 ނައިބްރައީސުން އައްޔަން ކުރުމަށްވެސް އިސްލާހު ހުށައެޅުމަށް ވަނީ ނިންމާފައެވެ.