ގައްބަރޭގެ ބަންދަށް 30 ދުވަސް ޖަހައިފި

ތޫނު ހަތިޔާރު ބޭނުންކޮށްގެން މާރާމާރީ ހިންގައި މީހަކު މަރާލަން އުޅުނު ކަމުގެ ތުހުމަތުކުރާ މއ. ނައިޓްވިލާ، އިބްރާހީމް އަބްދުﷲ، 32އ، (ގައްބަރޭ) ގެ ބަންދަށް ކްރިމިނަލް ކޯޓުން މިއަދު 30 ދުވަސް ޖަހައިފިއެވެ. ރައްޔިތުންގެ މަޖިލީހުގެ މަތިވެރި ދާއިރާގެ އެމްޑީޕީ މެންބަރު ހަސަން ޒަރީރު އަވަހާރަކޮށްލަން އުޅުނު ކަމުގެ ތުހުމަތުގައި ގައްބަރޭ ހޯދަމުންދާތާ ހަފުތާއެއް ފަހުން މިއަދު އޭނާ އަމިއްލައަށް ފުލުހަށް ހާޒިރުވުމުން ފުލުހުން ވަނީ އޭނާ ހައްޔަރުކޮށްފައެވެ. މެމްބަރު ހަސަން ޒަރީރަށް ހަމަލާދީފައި ވަނީ މިމަހު ފުރަތަމަ ދުވަހު ހެނދުނު 5:08 ހާ އިރު  'ހަބީބީ ކެފޭ އެންޑް ބިސްޓްރްރޯ' ގައި އިންނަވަނިކޮށެވެ. ފުލުހުން ބުނެފައިވަނީ، ޒަރީރަށް ހަމަލާ ދީފައިވަނީ، ނުރައްކާތެރި ހަތިޔާރެއްކަމަށް ބެލެވިދާނެ އެއްޗެއް ބޭނުންކޮށްގެން ކަމަށެވެ. އެމައްސަލައިގައި ދެމީހަކު ހައްޔަރު ކުރިއެވެ. އަދި މިމަހުގެ 15 ވަނަ ދުވަހު ގައްބަރޭ ހޯދަން ފުލުހުން ވަނީ އިއުލާންކޮށްފައެވެ. ގައްބަރޭ އަކީ އެމްޑީޕީ ގައުމީ މަޖިލީހުގެ މައްޗަންގޮޅީ ދެކުނު ދާއިރާގެ ރައީސެވެ. އޭނާ އަކީ  މީގެ ކުރިން ވެސް މާރާމާރީ އާއި ބޮޑެތި ކުށްތަކެއްގެ ރެކޯޑު އޮންނަ މީހެކެވެ.