ފުރާވަރުގެ ކުދިން ނަމާދަށް އަހުލުވެރިކުރުވުމުގެ ޕްރޮގްރާމެއް ދާންދޫގައި

ނަމާދަށް އަހުލުވެރި އާ ޖީލެއް ބިނާކުރުމުގެ މަސައްކަތް ގއ. ދާންދޫ ކައުންސިލް އިން ފަށައިފި އެވެ. ރަށުގެ ޅަޒުވާން ޖީލު ހެޔޮގޮތުގައި ބިނާކުރުމުގެ މަގުސަދުގައި އެ ކައުންސިލުން ހިންގުމަށް ރޭވިފައިވާ ޕްރޮގްރާމްތަކުގެ ތެރެއިން "ނަމާދަށް އަހުލުވެރި އާ ޖީލެއް" ބިނާކުރުން ޕްރޮގްރާމުގެ ދަށުން ހިންގާ 2ވަނަ ހަރަކާތް "ނަމާދު ޕްރޮގްރާމް" ގައި ބައިވެރިވުމުގެ  ފުރުސަތު މިހާރު އެ ކައުސިލުން ވަނީ ހުޅުވާލާފައެވެ. މި ޕްރޮގްރާމް އަމާޒުކުރަނީ ދާންދޫ ސްކޫލުގައި ކިޔަވަމުންދާ ޢުމުރުން 13 އަހަރާއި 14 އަހަރުގެ ދެޖިންސުގެ ދަރިވަރުންނަށެވެ. މިޕްރޮގްރާމުގެ މުއްދަތަކީ 15 ދުވަހެވެ. މިޕްރޮގްރާމުގެ ކިޔެވުން ފެށޭނީ ފެބުރުއަރީ ހަތަކުން ފެށިގެންނެވެ. މި ޕްރޮގްރާމުގެ ކިޔެވުން އޮންނާނީ 18:00 އިން ފެށިގެން 21:00 އާއި ދެމެދުގެ ވަގުތެއްގައެވެ. ފަހުން ބައިވެރިންނަށް ޓައިމްޓޭބަލް ހިއްސާކުރެވޭނެ ކަމަށް ވެސް އެ ކައުންސިކުން ނެރުނު އިއުލާނުގައި ވަނީ ބުނެފައެވެ. މި ޕްރޮގްރާމުގައި ބައިވެރިވާ ފަރާތްތަކުން މި މަހުގެ 31 ވަނަ ދުވަހުގެ 14:00ގެ ކުރިން ފޯމް ފުރައިގެން މިޕްރޮގްރާމުގައި ބައިވެރިވެވޭނެއެވެ. ދާންދޫ ކައުންސިލުން މިފަދަ ޕްރޮގްރާމެއް ފެށުމަށް ނިންމާފައިވާއިރު ސަރުކާރުން ވެސް ދަނީ ދީނީ އަޅުކަމަށް ފަރުވާތެރި ޖީލެއް ބިނާކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން ޒުވާން އިމާމުންނަށް ވެސް ފުރުސަތު ވަނީ ހުޅުވާލާފައެވެ. މިދިޔަ މަހު ދާންދޫގައި ވަނީ، ޒުވާން އިމާމުން ތަމްރީން ކުރުމުގެ ޕްރޮގްރާމެއް ހިންގާ، އެރަށު 7 ކުއްޖަކު އިމާމުންގެ ޕޫލުގައި ހިމަނާފައެވެ. [caption id="attachment_96109" align="aligncenter" width="864"] ދާންދޫގައި ހިންގި ޒުވާން އިމާމުން ތަމްރީން ކުރުމުގެ ކޯހުގެ ތެރެއިން، ދާންދޫ އިމާމް އަދި ދަރިވަރެއް--- ފޮޓޯ: ދާންދޫ ކައުންސިލް[/caption] މީގެ އިތުރުން ދާންދޫގެ އަމިއްލަ ޖަމިއްޔާ އެއް ކަމަށްވާ "ދާންދޫ އިސްލާމިކް ސޮސައިޓީ" އިން ވަނީ، ސްކޫލުކުދިންނަށް ނަމާދުކުރުން ދަސްކޮށްދީ ނަމާދަށް އަހުލުވެރި ކުރުވުމުގެ ދެ ކޯހެއް ހިންގާފައެވެ. ރާއްޖޭގެ ހުރިހާ މިސްކިތްތަކުގެ އިމާމުން ތަމްރީން ކުރުމުގެ ގައުމީ މަޝްރޫއެއް އަންނަ ފެބްރުއަރީ މަހު ފަށާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވެސް ވަނީ ވިދާޅުވެފައެވެ. އެ މަޝްރޫއުގެ ފުރަތަމަ ޕްރޮގްރާމް ވެސް ފަށުމަށް ހަމަޖެހިފައިވަނީ ގއ. އަތޮޅުގައެވެ.