ފުޅާ ދާއިރާ އެއްގައި ހަށި ވިއްކަމުގެ ވިޔަފާރި ކުރަމުންދިޔަ 7 ބިދޭސީއަކު ހައްޔަރުކޮށްފި

ފުޅާދާއިރާ އެއްގައި ހަށި ވިއްކުމުގެ ވިޔަފާރި ކުރަމުންދިޔަ ހަތް ބިދޭސީ އަކު މޯލްޑިވްސް އިމިގްރޭޝަނުން ހައްޔަރު ކޮށްފިއެވެ. އިމިގްރޭޝަނުން އެކްސް ގައި ކުރި ޕޯސްޓެއްގައި ބުނެފައިވަނީ މި ހަތް މީހުން ހައްޔަރު ކޮށްފައިވަނީ، ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރިކުރަމުންދިއަ ބިދޭސީން ހޯދުމަށް އިމިގްރޭޝަނާއި ފުލުހުން ގުޅިގެން މި މަހު ހިންގަމުން ދިޔަ ހާއްސަ އިންސްޕެކްޝަން ތަކެއްގައި ކަމަށެވެ. އިމިގްރޭޝަނުން ބުނީ، އެގޮތުން 05 މައްސަލައަކާއި ގުޅިގެން ބިދޭސީ 05 އަންހެނަކު އަދި އެޖެންޓުންގެ ގޮތުގައި މަސައްކަތް ކުރަމުންދިއަ ބިދޭސީ 02 ފިރިހެނަކު ވަނީ އިމިގްރޭޝަންގެ ބެލުމުގެ ދަށަށް ގެނެވިފައި ކަމަށެވެ. ‏މި މައްސަލަތައް ތަހުގީގު ކުރުމަށްފަހު ރާއްޖެ އަނބުރާ ނާދެވޭ ގޮތަށް މީގެތެރެއިން 3 ބިދޭސީ އަންހެނަކު މިހާރު ޑީޕޯޓުކޮށްފައި ވާ ކަމަށާއި، ބާކީ 4 ބިދޭސީން ޑީޕޯޓުކުރުމުގެ މަސައްކަތް މިހާރު ކުރަމުން ދާ ކަމަށް ވެސް އިމިގްރޭޝަނުން ވަނީ ބުނެފައެވެ.