ފުއްގިރި މައްސަލައިގެ ޝަރީއަތް މަޑުޖައްސަައިލަން ހައިކޯޓުން އަންގައިފި

ރ. ފުށްގިރި ކުއްޔަށް ދޫކުރުމުގައި ރިޝްވަތު ހިފުމާއި މަނީ ލޯންޑްރިން ހިންގާފައިވާ ކަމަށް ތުހުމަތުކޮށް، ކުރީގެ ރައީސް އަބްދުﷲ ޔާމީނާ ދެކޮޅަށް ދައުލަތުން ކްރިމިނަލް ކޯޓުގައި އުފުލާފައިވާ ޝަރީއަތް މަޑުޖައްސައިލުމުގެ އަމުރެއް ހައިކޯޓުން ނެރެފި އެވެ. އެ މައްސަލައިގެ އަޑުއެހުންތައް މަޑުޖައްސައިލުމުގެ އަމުރަަކަށް ޔާމީނުގެ ފަރާތްޕުޅުން ހައިކޯޓުގައި އެދުނީ ކްރިމިނަލް ކޯޓުގެ ޝަރީއަތުގެ ކުރިން އެމަނިކުފާނު ހުށަހެޅުއްވި ގިނަ ހުށަހެޅުއްވުންތައް ކްރިމިނަކް ކޯޓުން ބަލައި ނުގަންނަން ނިންމި ނިންމުން އިސްތިއިނާފުކޮށް، އެ އިސްތިއުނާފުގެ ތެރެއިންނެވެ. އެ މައްސަލައިގައި ހައިކޯޓުން އިއްޔެ ބޭއްވި އަޑު އެހުމުގައި ޔާމީނުގެ ފަރާތްޕުޅުން އެމަނިކުފާނުގެ ވަކީލުން އެދިވަޑައިގެންނެވީ ހައިކޯޓުގައި ކުރިއަށްދާ އިސްތިއުނާފީ މައްސަލައަށް ގޮތެއް ނިމެންދެން ކްރިމިނަލް ކޯޓުގެ އަޑު އެހުންތައް މަޑުޖައްސައިލުމަށެވެ. ހައިކޯޓުން މިއަދު ނެރުނު އަމުރުގައި ކްރިމިނަލް ކޯޓަށް އެންގީ އަޑު އެހުންތައް ކުރިއަށް ނުގެންދިއުމުގެ ވަގުތީ އަމުރަކަށް ޔާމީނުގެ ފަރާތުން އެދިފައި ވާތީ ހައިކޯޓުގެ ގަވައިދުގެ 69 ވަނަ މާއްދާއަށް ރިއާޔަތްކޮށް ، އެކޯޓުން ވަކި ގޮތެއް އަންގަންދެން ނުވަތަ އިސްތިއުނާފު މައްސަލަ ނިމެންދެން ކްރިމިނަލް ކޯޓުގެ އަޑުއެހުންތައް މަޑުޖައްސައިލުމަށެވެ. އެ އަމުރު ނެރުއްވީ ފަނޑިޔާރު މުހައްމަދު ފައިސަލްއާއި ފަނޑިޔާރު ހަސަން ޝަފީއު އަދި ފަނޑިޔާރު ދީބާނާޒް ފަހުމީ އެވެ.