މާލެ ސިޓީ މޭޔަރު އިންތިހާބުގެ ޕްރައިމަރީގައި އަލީ އާޒިމް އަށް ތާއީދު ކުރީ އާދަމް އާޒިމަކީ މި ސަރުކާރު ޖަވާބުދާރީ ކުރުވުމަށް އެއްވެސް ބަހެއް ބުނާނެ ބޭފުޅަކަށް ނުވާތީ ކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެ އެވެ.
ރޭ އެމްޑީޕީ ހަރުގޭގައި ބޭއްވި އަލީ އާޒިމް ކެމްޕެއިން ޖަލްސާގައި ވާހަކަދައްކަވަމުން ފައްޔާޒް ވިދާޅުވީ ވޭތިވެ ދިޔަ 2 އަހަރު މާލެސިޓީގެ މޭޗަރުކަމުގައި އެމްޑީޕީގެ މެންބަރެއް ހުރެގެން އެމްޑީޕީއަށް ލިބުނު އެއްވެސް ރަނގަޅެއް ނެތްއިރު، ރައީސް މުއިއްޒު އެކުރައްވާ ހުދުމުހުތާރު ވެރިކަމާ ދެކޮޅަށް ބަހެއް ވިދާޅުވާންވެސް މިހާރުގެ މޭޔަރަށް ކެރިވަޑައި ނުގަންނަވާ ކަމަށެވެ.
އަދި އެކަން އެހެން ވެގެންއުޅޭ ސަބަބަކީ މިސަރުކާރުން ބިލިއަނުން ފައިސާ ލިބޭ އަމިއްލަ ކުންފުންޏެއްގައި އެ ބޭފުޅާގެ މަސްލަތު އޮތުންކަމަށް ގަބޫލުކުރެވޭ ކަމަށެވެ. ނަމަވެސް މިއަދު މަޖިލީހުގައި އެމްޑީޕީއަށް ލިބިފައިވާ މަދު ގޮނޑިތަކާއެކު ސަރުކާރު ޖަވާބުދާރީ ކުރުވުމަށް މާލޭސިޓީގެ މޭޔަރާއި އެހެންވެސް ކައުންސިލަރުންގެ ޒިންމާ ވަރަށް ބޮޑު ކަމަށާއި، އެހެންކަމުން އެކަން ކުރާނެ ފަރާތެއް މާލެސިޓީގެ މޭޔަރުކަމަށްވެސް އަދި އެހެން ދާއިރާތަކުންވެސް ނެރުން ވަރަށް މުހިންމުކަމަށް ދެކިވަޑައިގަންނަވާ ކަމަށްވެސް ފައްޔާޒް ވިދާޅުވި އެވެ.
މީގެ އިރުރުން މިހާރުގެ މޭޔަރު އާދަމް އާޒިމް އަކީ އެމްޑީގެ މާލެސިޓީގެ ރައީސްގެ ހައިސިއްޔަތުންވެސް އެއްވެސް ކަމެއް ކުރައްވަމުންގެންދަވާ ބޭފުޅޭއް ނޫން ކަމަށާއި، އެގޮތުން މާލެސިޓީގައި އެމްޑީޕީ ވަރުގަދަކޮށް މެންބަރުން އިތުރުކުރުމަށްވެސް އެއްވެސް މަސައްކަތެއް މިހާތަނަށް ކުރައްވާފައިނުވާ ކަމަށްވެސް ފައްޔާޒް ވިދާޅުވި އެވެ.
