ދަރަނި މެނޭޖުކުރުމުގައި ފެއިލްވުމުގެ ސަބަބުން، ދިވެހި ރައްޔިތުންނަށް ވޯލްޑު ބޭންކުގެ ސަސްޓެއިނަބަލް ޑިވެލޮޕްމަންޓް ފައިނޭންސް ޕޮލިސީގެ ދަށުން ލިބެންއޮތް 33.7 މިލިއަން ޑޮލަރ (519 މިލިއަން ރުފިޔާ) ގެއްލިގެން ހިނގައްޖެ ކަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ ޝަމްހީދު ވިދާޅުވެއްޖެ އެވެ.
ޑރ ޝަމްހީދު އެކްސްގައި ކޮށްފައިވާ ޕޯސްޓްގައި ވިދާޅުވީ ދައުލަތުގެ މާލިއްޔަތު މެނޭޖުކުރުމަށް މި ސަރުކާރުން ގެންގުޅޭ ދޯހަޅި ސިޔާސަތާއި ހެދި، ހާއްސަކޮށް ދަރަނި މެނޭޖުކުރުމުގައި ފެއިލްވުމުގެ ސަބަބުން ބޮޑު ގެއްލުމެއް ދިވެހިރާއްޖެއަށް ވަމުންދާ ކަމަށެވެ.
އެގޮތުން ދިވެހި ރައްޔިތުންނަށް ވޯލްޑު ބޭންކުގެ ސަސްޓެއިނަބަލް ޑިވެލޮޕްމަންޓް ފައިނޭންސް ޕޮލިސީގެ ދަށުން ލިބެންއޮތް 33.7 މިލިއަން ޑޮލަރ (519 މިލިއަން ރުފިޔާ) ގެ އެހީ ނުލިބި، ގެއްލިގެން ހިނގައްޖެކަމުގެ މައުލޫމާތު ލިބިފައިވާ ކަމަށާއި، އެކަން އެހެންވެފައިވާނަމަ އެހެން ޤައުމެއްގައި ނަމަ، ރައްޔިތުންގެ މަޖިލީހުގައި މިއަދު ހިނގަމުންދާނީ ފިނޭންސް މިނިސްޓަރ މަގާމުން ވަކިކުރުމުގެ ބަހުސް ކަމަށެވެ.
