ޑައިމޯފިން ޓްރެފިކް ކުރުމުގެ ކުށް ސާބިތުވި މީހަކު 1 ލައްކަ ރުފިޔާއިން ޖޫރިމަނާކޮށް 25 އަހަރަށް ޖަލަށް ލާން ހުކުމް ކޮށްފި އެވެ.
މި މަހުގެ 10 ވަނަ ދުވަހު ށ. މާއުނގޫދޫ، ކޯޓުން އެރަށު ފެހިވިލާގެ މުޙައްމަދު ފާރިޤު (28އ) ގެ މައްޗަށް ގާނޫނު ނަންބަރު 17/2011 (މަސްތުވާތަކެއްޗާބެހޭ ގާނޫނު) ގެ 105 ވަނަ މާއްދާގެ ދަށުން އިއވާފައިވާ ހުކުމުގައި ބުނެފައިވަނީ ޑައިމޯފިން ޓްރެފިކް ކުރުމުގެ ކުއް އޭނާގެ މައްޗަށް ސާބިތުވެފައިވާ ކަމަށެވެ. އަދި ކުށުގެ އަދަބެއްގެ ގޮތުން 25 އަހަރަށް ޖަލަށް ލުމާއެކު 100،000 (އެއްލައްކަ) ރުފިޔާއިން ޖޫރިމަނާކުރުމަށް ހުކުމް ކޮށްފިއެވެ.
މި މައްސަލަ ފުލުހުންގެ ޚިދުމަތަށް ހުށަހަޅާފައި ވަނީ 2020 ނޮވެމްބަރު 24ވަނަ ދުވަހުއެވެ. މި މައްސަލައިގެ ތަހުގީގު ނިންމައި، އޭނާގެ މައްޗަށް ދައުވާ އުފުލުމަށް ޕްރޮސިކިއުޓަރ ޖެނެރަލްގެ އޮފީހަށް ފޮނުވާފައިވަނީ 2021 ޖަނަވަރީ 6ވަނަ ދުވަހުއެވެ.
