ދިވެހިންގެ އުފެއްދުންތެރިކަމުގެ މައުރަޒު 2025ގެ ވެބްސައިޓް އިފްތިތާހްކޮށްފި

ދިވެހިންގެ އުފެއްދުންތެރިކަމުގެ މައުރަޒު 2025ގެ ވެބްސައިޓް އިފްތިތާހްކޮށްފިއެވެ. މި ވެބްސައިޓް ލޯންޗްކޮށްދެއްވީ މިނިސްޓްރީ އޮފް އިކޮނޮމިކް ގެ މިނިސްޓަރ މުހައްމަދު ސައީދު އެވެ. އެ މައުރަޒު ބޭއްވުމަށް ހަމަޖެހިފައި ވަނީ އަންނަ އަހަރުގެ މެއި މަހުގެ ތެރޭގައެވެ. މި ވެބްސައިޓް މެދުވެރިކޮށް މައުރަޒުގައި ބައިވެރިވުމުގެ ފުރުސަތު މިހާރު ވަނީ ހުޅުވާލާފައެވެ. އަދި މައުރަޒާ ގުޅޭ މުހިންމު ގިނަ މައުލޫމާތުތަކެއް ވެބްސައިޓުން ލިބެން ހުންނާނެއެވެ. މި މައުރަޒަކީ ރާއްޖޭގެ އުފެއްދުންތެރިކަން އިތުރުކުރުމާއި ވިޔަފާރި ފުޅާކުރުމުގެ މަގްސަދުގައި އުފެއްދުންތެރިކަމަށް އަމާޒުކޮށްގެން ރައީސް ޑރ. މުހައްމަދު މުއިއްޒުގެ އިސްނެންގެވުމާއި އިރުޝާދުގެ ދަށުން ބާއްވާ މައުރަޒެކެވެ. އިކޮނޮމިކް މިނިސްޓްރީން ބުނީ، މި މައުރަޒުގައި އެކިއެކި ދާއިރާތަކުން ދިވެހިންގެ އުފެއްދުންތެރިކަން ފެންނާނެކަމަށެވެ. އަދި މިއީ ދިވެހިންގެ އުފެއްދުންތެރިކަން މުޅި ދުނިޔެއަށް ދައްކާލުމަށް ލިބޭ ރަނގަޅު ފުރުސަތެއްކަމަށް ވެސް މިނިސްޓްރީން ވަނީ ބުނެފައެވެ.