ދިވެހި ފަޅުވެރިން ނުލިބިގެން މަލިކުން މަސްވެރިން ގެންނަނީ

ފަޅުވެރިންގެ ގޮތުގައި މަސައްކަތްކުރާނެ ދިވެހިން ނުލިބުމުން "ނޯއާ" ދޯނިން އިންޑިޔާގެ ޓެރިޓަރީއެއްކަމަށްވާ މަލިކުން ފަޅުވެރިން ހޯދުމަށް އިއުލާންކޮށްފިއެވެ. އެ ދޯނިން ވަނީ މަލިކުން ހަތަރު ފަޅުވެރިން ހޯދަން އިއުލާންކޮށްފައެވެ. ނޯއާ ދޯނީގެ ވެރިޔާ އަބްދުލް ހަލީމް އަބްދުއް ނާސިރު "އިހަވަންދޫ" ނޫހަށް މައުލޫމާތު ދެމުން ބުނީ މަލިކުން ފަޅުވެރިން ހޯދަން އިއުލާންކުރުމާއިއެކު މަލިކު އަދި ލަކްޝަދީބުގެ ރައްޔިތުންގެ ފަރާތުން އަންނަނީ ވަރަށް ބޮޑު ތަރުހީބެއް ލިބެމުން ކަމަށެވެ. ހަލީިމް ބުނި ގޮތުގައި މަލިކުން މީހުން ގެންނަން ނިންމީ، އަގުހެޔޮވުމާއެކު އެމީހުންނަކީ ދިވެހި ބަހުން ވާހަކަ ދައްކާ ބަޔަކަށްވުމުންނެވެ. އަދި ދިވެހި މަސްވެރިކަމާ އެންމެ ގުޅޭ މަސްވެރިކަމެއްކުރަނީ މަލިކު މީހުންނަށް ވުމުގެ އިތުރުން ބަނގުލަދޭޝް މީހުންގެ ވިސާ އަގުބޮޑު ވުމުން ކަމަށް ވެސް ހަލީމް ބުންޏެވެ. ހަލީމަކީ އަބަދުވެސް ތަފާތުކަންކަން ތައާރަފްކުރާ އޮޑިވެރިއެއްކަމަށް އެނގިފައިވާ އިރު،  އޭނާ އަންނަނީ ނޯއާ ދޯނީގައި، އިންފޯމޭޝަން ޓެކްނޮލޮޖީ އެހީގައި މަސްވެރިންނަށް ފަސޭހަކޮށްދޭނޭ ގިނަ ވަސީލަތްތައް ބޭނުންކުރަމުންނެވެ. މަލިކު މީހުންނާއި އިހަވަންދޫ މީހުންގެ ދެމެދު ތާރީހީ އަދި އާއިލީ ގުޅުންތަކެއް އޮންނައިރު، ފަހަކަށް އައިސް އެ ގުޅުންތައް ދަނީ އިތުރަށް ބަދަހިވަމުންނެވެ. އެގޮތުން މަލިކާ 90 މޭލު ދުރުގައި އޮންނަ އިހަވަންދޫގެ ބަޔަކު މަލިކަށް ޒިޔާރަތް ކޮށް، މަލިކުގެ ގްރޫޕެއް ވަނީ އީދު ފާހަގަކުރުމަށް އިހަވަންދޫއަށް ގެނެސްފައެވެ.