ދިރާސީ އަހަރުގެ ކިޔެވުން ނިންމައި ދަރިވަރުން މިއަދު ބޮޑު ޗުއްޓީއަށް

ދިރާސީ އަހަރު ނިންމާލައި ދަރިވަރުން މިއަދު ބޮޑު ޗުއްޓީ ފަށައިފިއެވެ. ރާއްޖޭގެ 216 ސްކޫލެއްގައި މިއަދު ވަނީ ދަރިވަރުންނަށް ރިޕޯޓް ފޮތް ދީ ޗުއްޓީ ފަށާފައެވެ. އެގޮތުން، ދެން އަލުން ކިޔެވުން ފެށޭނީ އަންނަ މަހު 26 ގައެވެ.

ނަމަވެސް ގްރޭޑް 10 އެއް ނިންމައި އޯލެވެލް ހަދާ ދަރިވަރުންނަށް މިހާރު ވެސް އަންނަނީ އޯލެވެލްގެ އިމްތިހާނުތައް ކުރިއަށްދަމުންނެވެ.

އެޑިއުކޭޝަން މިނިސްޓްރީން ބުނީ މުޅި ރާއްޖޭގައި މި އަހަރު ޕްރީސްކޫލުން ފެށިގެން ގްރޭޑް 12 އާ ހަމައަށް 84،200 ދަރިވަރުން ތައުލީމު ހާސިލްކޮށްފައިވާ ކަމަށެވެ. އެ ދަރިވަރުންނަށް ކިޔަވައިދިނުމުގައި ދިވެހި 6،516 ޓީޗަރުންނާއި 1،843 ބިދޭސީ ޓީޗަރުން މަސައްކަތް ކުރި ކަމަށް ވެސް އެ މިނިސްޓްރީން ބުނެއެެ. އަންނަ މަހު ދިރާސީ އާ އަހަރު ފަށާއިރު، ރައީސް ޑރ. މުހައްމަދު މުއިއްޒުގެ ރިޔާސީ ވައުދާ އެއްގޮތަށް ވަކި މާއްދާއެއް ގޮތުގައި "ގައުމިއްޔަތު" ކިޔަވައިދޭން ފަށާނެ އެވެ. އާ ދިރާސީ އަހަރު މެއި 26 ގައި ފަށަން ނިންމާފައިވާއިރު، 2024-2025 ގެ ދިރާސީ ކަލަންޑަރުގައިވާ ގޮތުން ދިރާސީ އަހަރު ނިމޭނީ މާޗް 6 އަށެވެ. އަދި މާޗް 9 އިން އޭޕްރީލް 3 އަށް އެއީ ބޮޑު ޗުއްޓީ އެވެ. އެގޮތުން އަންނަ އަހަރުގެ ބޮޑު ޗުއްޓީ ދިމާވާނީ ރޯދަ މަހާ އެވެ.