ދެ ގެއެއް ބަލައި ފާސްކޮށް، ގަވާއިދާ ހިލާފަށް އުޅެމުންދިޔަ ދެ ބިދޭސީއަކު ހައްޔަރު ކޮށްފި

މާލޭގެ ދެ ގެއެއް ބަލައި ފާސްކޮށް ގަވާއިދާ ހިލާފަށް އުޅެމުން ދިޔަ އިތުރު ދެ ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފި އެވެ. އިމިގްރޭޝަނުން ބުނީ، އެ ދެ ބިދޭސީން ހައްޔަރުކޮށްފައިވަނީ، އާންމު ސަލާމަތާއި ރައްކާތެރިކަމަށް ނުރައްކާވާފަދަ ތަންތަނުގައި ގަވާއިދާ ހިލާފަށް އުޅެމުންދާ ބިދޭސީން ބަލައި ފާސްކުރުމަށް ޓާސްކު ފޯސް އިން ކުރަމުންދާ މަސައްކަތުގެ ތެރެއިން ކަމަށެވެ. އެ ދެބިދޭސީން ވެސް ވަނީ މިހާރު އިމިގްރޭޝަންގެ ބެލުމުގެ ދަށަށް ގެންދެވިފައި ކަމަށް އިމިގްރޭޝަނުން ވަނީ ބުނެފައެވެ. ބިދޭސީންގެ މައްސަލަ ހައްލުކުރުމަށް އިމިގްރޭޝަނުން ސިލްސިލާ އޮޕަރޭޝަންތަކެއް ކުރިއަށް ގެންދާއިރު ދާދި ފަހުން އިމިގްރޭޝަން އޮފިސަރަކަށް ވެގެން ބިދޭސީން އުޅޭ ތަނަކަށް ބަޔަކު ވަދެ ބިދޭސީއެއްގެ އަތުން ފޭރުމުގެ އަމަލެއްވެސް ވަނީ ހިންގާފައެވެ. މިކަމާ ގުޅިގެން އިމިގްރޭޝަނުން ވަނީ އެ އިދާރާ އިން ކުރިއަށް ގެންދާ އޮޕަރޭޝަންތަކުގައި އޮފިސަރުން އުޅޭނީ ޔުނިފޯމުގައި ކަމަށާއި، އަދި ފާސް އަޅައިން ކަމަށް ބުނެ އާންމުން ސަމާލުވުމަށް އިލްތިމާސްކޮށްފަ އެވެ.