ދަރަވަންދޫ ފުލުހުންގެ ބެލުމުގެ ދަށުގައި ހުރި ބަނގުރާ ފުޅީތަށް ނައްތާލައިފި

އެކި މައްސަލަތަކުގައި ބ. ދަރަވަނދޫ ފުލުހުންގެ ބެލުމުގެ ދަށަށް ގެނެސްފައިވާ ތަކެތީގެ ތެރޭގައި ހުރި ބަނގުރާ ފުޅީތަކެއް އެރަށު ޕޮލިސް ސްޓޭޝަނުން ނައްތާލައިފިއެވެ. ފުލުހުން ބުނީ، އެގޮތުން އިއްޔެ ނައްތައިލާފައިވަނީ 527 ފުޅި ބަނގުރަލާއި، 297 ދަޅު ބިޔަރު ކަމަށެވެ. ފުލުހުން ބުނި ގޮތުގައި އެ ތަކެއްޗަކީ 2022 ވަނަ އަހަރުގެ އޮކްޓޯބަރު މަހު އެކަކުން ފެށިގެން މި އަހަރުގެ މޭ މަހުގެ 31 ވަނަ ދުވަހުގެ ނިޔަލަށް ދަރަވަންދޫ ޑޮމެސްޓިކް އެއާޕޯޓަށް ފުރަންދިޔަ ފަތުރުވެރިންގެ އަތުން ފުލުހުންގެ ބެލުމުގެ ދަށަށް ގެނެސްފައިވާ ތަކެއްޗެވެ. ފުލުހުން ބުނީ، ބަނގުރާ ނައްތާލުން ކުރިއަށް ގެންގޮސްފައިވަނީ ފުލުހުންގެ ބެލުމުގެ ދަށަށް ގެނެވޭ ބަނގުރާ އަދި ބަނގުރާގެ މައްސަލަތަކާ ގުޅިގެން ހިފެހެއްޓޭ ތަކެތި ނައްތާލުމުގައި އަމަލުކުރާ ގޮތުގެ ގަވާއިދުގެ ދަށުން އެކަމަށްޓަކައި އެކުލަވައިލި ކޮމިޓީގެ ބެލުމުގެ ދަށުން ކަމަށެވެ.