ޑިމޮކްރެޓްސްގެ ޓިކެޓްތައް ސައިފް އަދި ފިރުޝާންއަށް

އެންމެފަހުން ވުޖޫދަށް އައި ސިޔާސީ ޕާޓީ، ޑިމޮކްރެޓްސްއިން މިއަދު ބޭއްވި މަޖިލިސް ޕްރައިމަރީ އިންތިހާބު، ސައިފް އަދި ފިރުޝާން ކާމިޔާބުކޮށްފިއެވެ. މީގެ ތެރެއިން ގަލޮޅު އުތުރު ދާއިރާގެ ކައުންސިލަރު، ސައިފް ފާތިހު ވާދަކުރައްވާފައިވަނީ ހެންވޭރު ދެކުނު ދާއިރާއަށެވެ. އެ ދާއިރާގެ ޓިކެޓް ސައިފް ކާމިޔާބުކުރީ އަހުމަދު އަސްވަން އާ ވާދަކޮށެވެ. ރައްޔިތުން މަޖިލީހުގެ ގދ.މަޑަވެލި ދާއިރާ ތަމްސީލްކުރައްވަމުންގެންދަވާ ހުސައިން ފިރުޝާން މިފަހަރު ވާދަކުރެއްވީ ހުޅުމާލޭ ދެކުނު ދާއިރާއަށެވެ. މި ދާއިރާގެ ގޮނޑި އޭނާ ކާމިޔާބުކުރެއްވީ ހަސަން އާގިލް އަދި މުހައްމަދު ނުއުމާން އާ ވާދަކޮށެވެ. https://twitter.com/TheDemocratsMV/status/1753742902470357013 ޑިމޮކްރެޓްސްއިން މިއަދު ވޯޓުލުން ކުރިއަށްގެންގޮސްފައިވަނީ ހެންވޭރު ދެކުނު ދާއިރާ އަދި ހުޅުމާލޭ ދެކުނު ދާއިރާގެ އެކަންޏެވެ. ޑިމޮކްރެޓްސްއިން މަޖިލީހުގެ 41 ދާއިރާއަކަށް ވާދަކުރުމަށް ވަނީ ނިންމާފައެވެ. ޑިމޮކްރެޓްސްގެ ޕްރައިމަރީ ކުރިއަށްގެންދިޔަ ދާއިރާތައް:

• ކެލާ ދާއިރާ
• ކަނޑިތީމު ދާއިރާ
• ހުޅުމާލެ ދެކުނު ދާއިރާ
• ހެންވޭރު ދެކުނު ދާއިރާ

ޑިމޮކްރެޓްސްގެ ޓިކެޓު ޕްރައިމަރީއަކާ ނުލައި ލިބުނު ކެންޑިޑޭޓުންގެ ތެރޭގައި ރައްޔިތުންގެ މަޖިލީހުގައި އެ ޕާޓީ ތަމްސީލު ކުރައްވާ ބައެއް މެމްބަރުން ހިމެނެއެވެ. އޭގެ ތެރޭގައި މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް، ގަލޮޅު އިތުރު ދާއިރާގެ މެމްބަރު އީވާ އަބްދުﷲ، މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ، ހެންވޭރު ހުޅަނގު ދާއިރާގެ މެމްބަރު ހަސަން ލަތީފު އަދި މާފަންނު އުތުރު ދާއިރާގެ މެމްބަރު އިބްރާހިމް ރަޝީދު ހިމެނިވަޑައިގަންނަވައެވެ. މަޖިލިސް އިންތިހާބު ބޭއްވުމަށް ހަމަޖެހިފައިވަނީ އަންނަ މަހުގެ 17 ވަނަ ދުވަހުއެވެ. އެއީ ރޯދަމަހުގެ ފުރަތަމަ ހަފްތާއެވެ.