ޗައިނާއިން ރާއްޖެއަށް 10 ޕިކަޕް ހަދިޔާކޮށްފި

ޗައިނާގެ ޝަންގް ޑޮންގް ޕްރޮވިންސްއިން ރާއްޖެއަށް މުނިސިޕަލް މަސައްކަތަށް 10 ޕިކަޕް ހަދިޔާކޮށްފިއެވެ. މި ޕިކަޕްތަކާއި ދިވެހި ސަރުކާރުގެ ފަރާތުން ހަވާލުވެލެއްވީ ސިޓީތަކާއި އިދާރީ ދާއިރާތައް ހިންގުމާއި އާއްމު  މަސައްކަތްތަކާއި ބެހޭ ވަޒީރު އާދަމް ޝަރީފް އުމަރުއެވެ. އަދި ޗައިނާގެ ފަރާތުން ޕިކަޕްތައް ހަދިޔާ ކުރުމުގެ ލެޓަރ އޮފް އެކްސްޗޭންޖްގައި ސޮއިކުރެއްވީ ދިވެހިރާއްޖޭގައި ހުންނަވާ ޗައިނާގެ ސަފީރު ވަންގ ލިޒިންއެވެ. މި ރަސްމިއްޔާތުގައި ޝަރީފް ވިދާޅުވީ، މި ޕިކަޕްތައް ބޭނުން ކުރާނީ އެ ވުޒާރާގެ ދަށުން ރާއްޖޭގެ 7 ސަރަހައްދުގައި މިވަގުތު ހިންގަމުންދާ ޕަބްލިކް ވޯކް ޔުނިޓްތަކުގައި ކަމަށެވެ. އަދި ޕިކަޕްތައް އެ ޔުނިޓްތަކާއި ހަވާލު ކުރުމުގެ މަސައްކަތް ކުރިއަށް ހުރި ދުވަސްތަކުގެ ތެރޭގައި ކުރިއަށް ގެންދާނެ ކަމަށް ވަނީ ވިދާޅުވެފައެވެ. މިއީ ރައިސް މުއިއްޒު ޗައިނާއަށް ކުރެއްވި ފުރަމާނަ ޒިޔާރަތުގެ ތެރެއިން ކުރެވުނު މަޝްވަރާތަކުގެ ތެރެއިން ހަމަޖެހިގެން ދިޔަ އެހީއެއް ކަމަށް އެ ވުޒާރާއިން ބުންޏެވެ. ރައީސްގެ މި ދަތުރުފުޅުގެ ތެރެއިން ޗައިނާގެ ފަރާތުން ހިލޭ އެހީގެ އިތުރުން އެކި ދާއިރާތަކުން ގުޅުން ބަދަހިކުރުމުގެ ގިނަ އެއްބަސްވުންތަކެއްގައި ދެ ގައުމުގެ ދެމެދު ވަނީ ސޮއިކުރައްވާފައެވެ. މީގެ ތެރޭގައި 17 ރަށަކަށް ބޭނުންވާ ލެބޯޓަރީ ވަސީލަތާއި، 1500 ޓަނުގެ ބޯފެން ހިމެނެއެވެ.