ބުޅަލެއްގައި ޖެހި ފުވައްމުލަކުގައި ނުރައްކާތެރި އެކްސިޑެންޓެއް

ފުވައްމުލަކު ސިޓީގައި ދުއްވާފަދިޔަ ސައިކަލެއްގެ ކުރިމައްޗަށް ބުޅަލެއް އެރުމުން، ނުރައްކާތެރި އެކްސިޑެންޓެއް ހިނގައި އަންހެނަކަށް އައިސީޔޫގައި ފަރުވާދޭން ފަށައިފިއެވެ. އެސިޓީގެ މިސްކިތް މަގުން ދުއްވާފަ ދިޔަ ސައިކަލެއް ބުޅަލެއްގައި ޖެހި އެކްސިޑެންޓެއް ހިނގާފައިވާކަމަށް ރޭ 21:00 ގައި ފުލުހުނަށް ރިޕޯޓް ލިބިފައިވާ ކަމަށް ފުލުހުން ބުންޏެވެ. އެ އެކްސިޑެންޓްގައި ސައިކަލު ދުއްވި 36 އަހަރުގެ އަންހެން މީހާއަށް  ފުވައްމުލަކު ހޮސްޕިޓަލްގައި ފަރުވާ ދެމުން އަންނަ ކަމަށް ވެސް ފުލުހުން ބުންޏެވެ. އެނގިފައިވާ ގޮތުގައި އޭނާ އިތުރު ފަރުވާ އަށް މިއަދު މާލެ ފުރުވައިލަން އަންނަނީ މަސައްކަތްކުރަމުންނެވެ. އެކްސިޑެންޓް ހިނގި އިރު ސައިކަލު ފަހަތުގައި އިން އެމީހާގެ 12 އަަހަރުގެ އަންހެން ދަރިފުޅަށް ވެސް އެކިވަރުގެ އަނިޔާ ލިބިފައިވާ ކަމަށް ފުލުހުން ބުންޏެވެ. އެކްސިޑެންޓްވި ބުޅާ މަރުވެފައިވާ ކަމަށް މައުލޫމާތު ލިބެއެވެ.