ބޮޑުތަކުރުފާނު މަގު މަރާމާތުކުރުމަށް ޗައިނާ ކުންފުންޏަކާ ހަވާލުކުރީ 1.4 މިލިއަން ރުފިޔާއަށް

ބޮޑުތަކުރުފާނު މަގުގެ ތާރުއަޅަފައިވާ ސަރަހައްދު މަރާމާތުކުރުމުގެ މަސައްކަތް 1.4 މިލިއަން ރުފިޔާއަށް ޗައިނާގެ ހުނާން ކޮންސްޓްރަކްޝަން އިންޖިނިއަރިންގ އާއި ހަވާލުކޮށްފައިވާ ކަމަށް މާލެ ސިޓީ ކައުންސިލުން މިއަދު ބުނެފިއެވެ. މޭޔަރު ޑރ. މުހައްމަދު މުއިއްޒު ވިދާޅުވީ އެ މަސައްކަތުގެ ތެރެއިން ބޮޑުތަކުރުފާނު މަގުގެ 32 ތަނެއް މަރާމާތުކުރަން ހަމަޖެހިފައިވާ ކަމަށެވެ. އަދި  ބޮޑުތަކުރުފާނު މަގާއި އިއްޒުއްދީން މަގުގެ ތާރު އެޅި ބައި މަރާމާތުކުރުމުގެ މަސައްކަތް 10 ވަރަކަށް ދުވަހުގެ ތެރޭގައި ނިމޭނެކަމަށް އުންމީދުކުރާ ކަމަށާއި، އެއްބަސްވުމުގައި ވާގޮތުން އެމަގުގެ މަރާމާތު ކުރަންޖެހޭ 32 ތަނުގެ މަސައްކަތް ނިންމަން ދީފައިވަނީ 30 ދުވަހުގެ މުއްދަތެއް ކަމަށްވެސް މޭޔަރ ވިދާޅުވިއެވެ. [embed]https://twitter.com/MMuizzu/status/1650073809427501057?s=20[/embed] 2018 ވަނަ އަހަރުގެ ތެރޭގައި އެމަގުގައި ތާރުއަޅުމުގެ މަސައްކަތް ނިންމައި އާއްމުންނަށް ހުޅުވާލާފައިވީ ނަމަވެސް އެ މަގުގެ ބައެއް ސަރަހައްދުތައް ވަނީ ހަލާކުވެފައެވެ. އެގޮތުން މިދިޔަ ހުކުރު ދުވަހު ވަނީ ސިޓީ ކައުންސިލުން އެމަގު ހެދުމުގެ މަސައްކަތް ފަށާފައެވެ. ބޮޑުތަކުރުފާނު ހެދުމުގެ ކުރީގެ މަޝްރޫއުގައި މާލޭ އިންޑަސްޓްރިއަލް ވިލެޖު ސަރަހައްދުން ފެށިގެން، ހުޅުމާލެ ފެރީ ޓަރމިނަލާ ހަމައަށް އޮންނަ ސަރަހައްދުގައި ތާރުއަޅައި ވަނީ ނިންމާލާފައެވެ. އެހެންކަމުން މިފަހަރު މި މަޝްރޫއުގެ މަގްސަދަކީ ޒަމާނީ ފެންވަރަށް ތަރައްގީކޮށް ބްރިޖަށް ދާން އޮންނަ ބޮޑު މަގަކީ ވީހާވެއް ތޮއްޖެހުން ކުޑަ ދުއްވަން ފަސޭހަ މަގެއްގެ ގޮތުގައި ހެދުމެވެ.