ބޯކޮށް ވާރޭވެހި، ގުގުރާ، ކަނޑު ގަދަވެ، އުދަ ވެސް އަރާފާނެ ކަމަށް ލަފާކޮށްފި

ރާއްޖޭގެ ބޮޑު ސަރަހައްދަކަށް ބޯކޮށް ވާރޭ ވެހުމާއެކު ގުގުރާނެ ކަމަށާއި ކަނޑުތައްވެސް ގަދަވާނެ ކަމަށް ލަފާކޮށް ރާއްޖޭގެ މޫސުމާއި ބެހޭ ގައުމީ އިދާރާ (މެޓް) އެލާޓް ނެރެފި އެވެ. މިއަދު ނެރެފައިވާ ރީނދޫ ސަމާލުގައި ބުނެފައިވަނީ، ބޯކޮށް ވާރޭ ވެހުމާއެކު ގުގުރާނެ ކަމަށާއި ވިލާގަނޑުގައި 45 މޭލަށް ވައިގަވެ ކަނޑުތައް ގަދަވާނެ ކަމަށެވެ. މި އެލާޓް ނެތެފައި ވަނީ މިއަދު 10:30 އިން 14:30 އަށް ކ. އަތޮޅުން ފެށިގެން ވ. އަތޮޅާއި ހަމައަށެވެ. އަދި މެޓް އިން 9:30 ގައި ނެރުނު ހުދު ސަމާލުގައި ބުނެފައި ވަނީ ބޯކޮށް ވާރޭ ވެހުމާއެކު ގުގުރާނެ ކަމަށާއި ގަޑިއަކު 22 މޭލާއި 27 މޭލާ ދެމެދުގެ ބާރުމިނުގައި ވައިޖެހި ވިލާގަނޑުގައި ގަޑިއަކު 40 މޭލަށް ވައިގަވެ ކަނޑުތައް ގަދަވާނެ ކަމަށް ލަފާ ކުރެވޭ ކަމަށެވެ. މި ސަމާލު ނެރެފައި ވަނީ ރ. އަތޮޅުން ފެށިގެން ލ، އަތޮޅާއި ހަމައަށެވެ. މި ސަމާލުގެ މުުއްދަތު ހަމަވާނީ މެންދުރު ފަހު 3:30 އަށެވެ. މިއަދުގެ މޫސުން ކުރިއަށް ލަފާކޮށް މެޓް އޮފީހުން ވިދާޅުވީ، އެކި ހިސާބަށް ވިއްސާރަކުރާނެ އަދި ބައެއް ރަށްތަކަށް ބޯކާށް ވާރޭވެހި ގުގުރުން އެކަށީގެންވާ ކަމަށެވެ. އަދި ރާއްޖޭގެ ކަނޑުތައް އާއްމު ގޮތެއްގައި ގަދަވާނެ ކަމަށް ލަފާކޮށްފައިވާއިރު،ހުރިހާ ފަރާތްތަކުން، ހާއްސަކޮށް ކަނޑުދަތުރު ކުރަށްވާފަރާތްތަކުން މޫސުމަށް ސަމާލުވުމަށް އެދޭ ކަމަށް ވިދާޅުވެފައި ވެއެވެ. އަދި ދިޔަވަރު ބޮޑުވާ ގަޑިތަކުގައި އުދައިގެ އަސަރުކުރުން އެކަށީގެންވާ ކަމެއް ކަމަށްވެސް ވިދާޅުވެފައި ވެއެވެ.  ރީނދޫ އެލާޓް ނެރެފައި އޮންނަ އިރު ކަނޑުމަތީގައި ކުދި އުޅަނދު ދުއްވުމަކީ މަނާކަމެކެވެ. މިކުރަމުންދާ ވިއްސާރާގައި ދަތުރުފަތުރުކުރުމުގައި ސަމާލުވުމަށް އިދާރާތަކުން ދަނީ އިލްތިމާސް ކުރަމުންނެވެ.