ބޭރަށް ހިނގުމާއި ހޮޑުލުން އިތުރުވާތީ އެކަމަށް ސަމާލުވުމަށް އެޗްޕީއޭއިން އިލްތިމާސްކޮށްފި

މިދުވަސްވަރު ބޭރަށް ހިނގުމާއި ހޮޑުުލުން އިތުރުވަމުންދާތީވެ، އެކަމަށް ސަމާލުވުމަށް ހެލްތް ޕްރޮޓެކްޝަން އޭޖެންސީ (އެޗްޕީއޭއިން) އިލްތިމާސްކޮށްފިއެވެ. މިކަމާ ގުޅޭގޮތުން އެޗްޕީއޭއިން މިއަދު ބުނީ ބޭރަށް ހިނގުމާއި ހޮޑުލުމުގެ ކޭސްތައް ރިޕޯޓްކުރާ އަދަދު މާލޭ ސަރަހައްދުގައި އިތުރުވަމުން އަންނަ ކަމަށެވެ. މިދުވަސްވަރަކީ ގިނަ ފަރާތްތައް އެއްވެ، ކާބޯތަކެތި ތައްޔާރުކޮށް އެއްކޮށް ކައި ހަދާ ދުވަސްވަރެއްކަމުން، ބަލިން ރައްކާތެރިވުމަށް ޚާއްސަ ސަމާލުކަމެއް ދެއްވުމަށް އެޗްޕީއޭއިން އެދެއެވެ. ބޭރަށް ހިނގުމާ ހޮޑުލުމުގެ ކޭސްތަކަށް ބަލާއިރު، ފެބްރުއަރީ 18 އިން 24 ގެ ނިޔަލަށް 965 ކޭސް ރިޕޯޓްކޮށްފައިވާއިރު، ފެބުރުއަރީ 25 ހުން މިމަހުގެ 2 ވަނަ ދުވަހުގެ ނިޔަލަށް 889 ކޭސް ވަނީ ރިޕޯޓްކޮށްފައެވެ. ބޭރަށް ހިނގުމާއި ހޮޑުުލުން އިތުރުވަމުންދާތީ އެޗްޕީއޭއިން ވަނީ ބޭރަށް ހިންގުން ފަދަ ބަލިތަކުން ރައްކާތެރިވުމަށް ރަނގަޅަށް ސައިބޯނި ލައިގެން އަތްދޮވުމަށް ހަނދާންކޮށްދީފައެވެ. https://twitter.com/HPA_MV/status/1764938004890833155 މީގެ އިތުރުން ބޭރަށް ހިނގާނަމަ ގިނަގިނައިން ލޮނުޕެކެޓް، ފެން އަދި ދިޔާ ސޫޕްފަދަ ތަކެތި ބޭނުންކުރުމާއި، ފާހާނާ ކުރުމަށްފަހު، އަދި ކާބޯތަކެތި ތައްޔާރުކުރުމުގެ ކުރިން ރަނގަޅަށް ސައިބޯނި ލައިގެން އަތްދޮންނަން ޖެހެއެވެ. އަދި ބޭރަށް ހިނގުމުގެ އަލާމަތްތައް ފެންނަނަމަ ކުދިން ސްކޫލަށް ނުފޮނުވުމަށްވެސް އެޗްޕީއޭއިން އެދެއެވެ.