އަމިއްލަ ކުންފުންޏަކުން އެމްއެންޑީއެފަށް މުވާސަލާތީ އާލާތްތަކެއް ހަދިޔާކޮށްފި

އަމިއްލަ ކުންފުންޏަކުން އެމްއެންޑީއެފަށް މުވާސަލާތީ އާލާތްތަކެއް ހަދިޔާކޮށްފިއެވެ. އެ ތަކެތި ހަދިޔާކުރީ ޕްރޯލައިން ކޮމްޕެނީ ޕްރައިވެޓް ލިމިޓެޑްގެ ފަރާތުންނެވެ. އެކަމަށްޓަކައި ބަންޑާރަކޮށި އޮޑިޓޯރިއަމްގައި ބޭއްވި ޚާއްޞަ ރަސްމިޔާތުގައި، އެމްއެންޑީއެފްގެ ފަރާތުން އެ އިކުއިޕްމަންޓްސްއާ ހަވާލުވެވަޑައިގެންނެވީ ޗީފް އޮފް ޑިފެންސް ފޯސް، ލެފްޓިނެންޓް ޖެނެރަލް އަބްދުއްރަޙީމް އަބްދުއްލަޠީފެވެ. އެމްއެންޑީއެފުން ބުނީ ޕްރޯލައިންގެ ފަރާތުން އަސްކަރިއްޔާއަށް ހަދިޔާކުރި ތަކެތީގެ ސަބަބުން އެމްއެންޑީއެފްގެ ސަވައިލެންސް ކެޕޭސިޓީ އިތުރުކުރުމަށް މަގުފަހިވާނެ ކަމަށެވެ. އެ ރަސްމިއްޔާތުގައި ޑިފެންސް މިނިސްޓަރު ގައްސާން މައުމޫނާއި، ވައިސް ޗީފް އޮފް ޑިފެންސް ފޯސް، ބްރިގޭޑިއަރ ޖެނެރަލް އިބްރާހީމް ހިލްމީގެ އިތުރުން ޖެނެރެލް އޮފިސަރުންނާއި ސީނިއަރ އޮފިސަރުން ބައިވެރިވެވަޑައިގެންނެވިއެވެ.