އެމެރިކާގައި ރާއްޖޭގެ އެމްބަސީ ހުޅުވައިފި

އެެމެރިކާގައި ހުންނަ ރާއްޖޭގެ އެމްބަސީގެ ނަމުގައި އިއްޔެ އަލުން، އެމެރިކާގެ ވެރިރަށް ވޮޝިންޓަން ޑީސީގައި ރާއްޖޭގެ އެމްބަސީއެއް  ހުޅުވައިފި އެވެ. އެ އެމްބަސީ ހުޅުވުމަށް ވޮޝިންޓަންގައި އޮތް ރަސްމިޔާތު ޝަރަފްވެރިކޮށްދެއްވީ ފޮރިން މިނިސްޓަރު އަބްދުﷲ ޝާހިދެވެ. އެ ރަސްމިއްޔާތުގައި އެމެރިކާގެ ސްޓޭޓް ޑިޕާޓްމަންޓުގެ އެސިސްޓެންޓް ސެކްރެޓަރީ ޑޮނަލްޑް ލޫ ބައިވެރިވެވަޑައިގެންނެވި އެވެ. އެ ރަސްމިއްޔާތުގައި ލޫ ވިދާޅުވީ މިއީ، މި ސަރަހައްދުގެ ގައުމުތަކާ އެމެރިކާގެ ގުޅުން އިތުރަށް ވަރުގަދަވާނެ ކަމެއް ކަމަށެވެ. ވޮޝިންޓަނުގައި ރާއްޖޭގެ އެމްބަސީއެއް ހުޅުވުމުގެ މަސައްކަތް ސަރުކާރުން ފަށާފަައިވާކަން އިއުލާނުކޮށްފައި މިދިޔަ ސެޕްޓެމްބަރު މަހުގެ ތެރޭގަ އެވެ. އަދި ރައީސް އިބްރާހިމް މުހައްމަދު ސޯލިހް ވަނީ، ރާއްޖޭން އެމެރިކާއަށް ކަނޑައަޅާ ސަފީރުގެ މަގާމަށް އަބްދުލް ގަފޫރް މުހައްމަދު އައްޔަންކުރައްވާފަ އެވެ. ކުރިން އެމެރިކާ އިން ރާއްޖެއާއެކު ކުރާ ހާރިޖީ މުއާމަލާތްތައް ކުރިއަށް ގެންދަނީ ސްރީ ލަންކާގައި ހުންނަ އެމެރިކާ އެމްބަސީ މެދުވެރިކޮށެވެ. އެމެރިކާގައި ރާއްޖެ ތަމްސީލުކުރަނީ އދ. ގައި ހުންނަ ރާއްޖޭގެ މިޝަން މެދުވެރިކޮށެވެ. ވޮޝިންޓަންގައި ރާއްޖޭގެ އެމްބަސީއެއް އިއްޔެ އަލުން ހުޅުވާފައިވާ އިރު، އެމެރިކާގެ އެމްބަސީއެއް ރާއްޖޭގައި ހުޅުވަން ވެސް އަންނަނީ ތައްޔާރުވަމުންނެވެ. އެ ތަން ހަދަނީ ހުޅުމާލޭގައި ހުންނަ 'އުމަރު ޒާހިރު އޮފީސް ބިލްޑިން'ގަ އެވެ.