ޖަމީލްގެ އާއިލާއާ ބައްދަލުކުރައްވާ ރައީސް ތައުޒިޔާ ވިދާޅުވެއްޖެ

ރައީސް އިބްރާހީމް މުހައްމަދު ސޯލިހު އަލްމަރްޙޫމް ޢަބްދުﷲ ޖަމީލް (ނ.ޢ.ޢ.ވ)ގެ އާއިލާއާ ބައްދަލުކުރައްވައި އެ މަރްހޫމްގެ އަގުހުރި ހިދުމަތްތަކުގެ ހަނދާންތައް އައު ކުރައްވައި އާއިލާއަށް ތައުޒިޔާ ވިދާޅުވެއްޖެއެވެ. މަރްހޫމްގެ އާއިލާގެ ބޭފުޅުންނާ ރައީސް ސޯލިހު ބައްދަލުކުރެއްވީ މިއަދު ހެނދުނު ރައީސް އޮފީހުގައެވެ. މި ބައްދަލުކުރެއްވުމުގައި ނައިބު ރައީސް ފައިސަލް ނަސީމްވެސް ބައިވެރިވެވަޑައިގެންނެވިއެވެ. މި ބައްދަލުކުރެއްވުމުގައި ރައީސް ސޯލިހު ދެއްކެވި ވާހަކަފުޅުގައި 54 އަހަރުގެ ދިގު މުއްދަތަކަށް މަރްހޫމް އަބްދުﷲ ޖަމީލް (ނ.ޢ.ޢ.ވ) ދައުލަތަށް ކޮށްދެއްވާފައިވާ ހިދުމަތްތަކުގެ ހަނދާންތައް އައުކުރެއްވިއެވެ. މަރްހޫމްގެ ހިދުމަތްތަކުގެ ހަނދާންތައް އައުކުރައްވަމުން ރައީސް ސޯލިހު ވިދާޅުވީ ގެއްލިގެން އެދިޔައީ ދަޢުލަތާއި މުޅި ގައުމުގެ ހިދުމަތްތެރިއެއް ކަމުގައެވެ. އަދި ރައީސް ސޯލިހު ވަނީ ސަރުކާރާއި އެމަނިކުފާނުގެ އަމިއްލަ ނަންފުޅުގައި މަރްހޫމްގެ އާއިލާއަށް ތައުޒިޔާ ވިދާޅުވެފައެވެ. މި ބައްދަލުކުރެއްވުމުގައި އެ މަރްޙޫމްގެ ޢާއިލާއިން ވަނީ މަރްޙޫމް ޢަބްދުﷲ ޖަމީލް (ނ.ޢ.ޢ.ވ)ގެ ޚިދުމަތުގެ އަގުވަޒަންކުރައްވައި ސަރުކާރުން ކުރައްވަމުން ގެންދަވާ ކަންކަން ޝުކުރުވެރިކަމާއެކު ފާހަގަކުރައްވާފައެވެ. މި ބައްދަލުކުރެއްވުމަށްފަހު ރައީސް ސޯލިހު ވަނީ އަލްމަރްހޫމް އިބްދުﷲ ޖަމީލް (ނ.ޢ.ޢ.ވ)ގެ ހަނދާނުގައި ރައީސް އޮފީހުގައި ހުޅުވި ތައުޒިޔާގެ ދަފުތަރުގައި ސޮއިކުރައްވާފައެވެ. މި ދަފްތަރުގައި އެންމެ ފުރަތަމަ ސޮއިކުރެއްވީ ރައީސް ސޯލިހު އެވެ. އެއަށްފަހު ނައިބު ރައީސް އެވެ. ތައުޒިޔާގެ ދަފުތަރުގައި ރައީސް ސޯލިހު ލިޔުއްވި ބަޔާނުގައި ވަނީ އަބްދުﷲ ޖަމީލް (ނ.ޢ.ޢ.ވ)ގެ އަވަހާރަވުމަކީ މުޅި ޤައުމަށް ލިބުނު ހިތާމައެއްކަން ފާހަގަކުރައްވައި މަރްޙޫމްގެ 54 އަހަރުގެ ގައުމީ ހިދުމަތުގައި ފާހަގަކުރެވިގެން ދަނީ ކޮންމެ ކަމެއްގައިވެސް ދިވެހި ދަޢުލަތާއި ރައްޔިތުންގެ މަސްލަޙަތަށް އިސްކަންދެއްވި ބޭފުޅެއްގެ ގޮތުގައިކަން ފާހަގަކުރައްވާފައިވެއެވެ. އަދި ދިވެހިރާއްޖޭގެ ޤައުމީ ހަޔާތުގަޔާއި ބަރުލަމާނީ ހަޔާތުގައި އަދާކުރައްވާފައިވާ ހިދުމަތްތެރި ދައުރަށް ރައީސް ސޯލިހު ވަނީ އިހްލާސްތެރިކަމާއެކު ޝުކުރު އަދާކުރައްވާފައެވެ. ތައުޒިޔާގެ ދަފުތަރުގައި ރައީސް ސޯލިހު ލިޔުއްވި ބަޔާން ނިންމަވާލައްވާފައި ވަނީ މަރްހޫމް އަބްދުﷲ ޖަމީލް (ނ.ޢ.ޢ.ވ)ގެ ފުރާނަފުޅަށް ހެޔޮ ރަޙްމަތްލައްވައި ސުވަރުގޭގެ ދާޢިމީ ނިޢުމަތް މިންވަރުކުރެއްވުމަށް ދުއާ ދަންނަވަމުންނެވެ. އަލްމަރްޙޫމް އަބްދުﷲ ޖަމީލް (ނ.ޢ.ޢ.ވ)ގެ ހަނދާނުގައި ރައީސް ސޯލިހުގެ އޮފީހުގައި ހުޅުވި ތައުޒިޔާގެ ދަފުތަރުގައި މަރްޙޫމްގެ ހިދުމަތްތަކުގެ ހަނދާންތައް އައުކުރައްވައި ރައީސް ސޯލިހުގެ ނައިބުވެސް ވަނީ ބަޔާނެއް ލިޔުއްވާފައެވެ. އަލްމަރްޙޫމް ޢަބްދުﷲ ޖަމީލް (ނ.ޢ.ޢ.ވ) ދެމިއޮތުމުގެ ޢާލަމަށް ދަތުރުކުރެއްވުމުގެ ހިތާމައިގައި، ޖޫން 12ވާ ހޯމަ ދުވަހުގެ މެންދުރު ފަހު. 1:00އިން ފެށިގެން ތިންދުވަސް ވަންދެން ދިވެހި ގައުމީ ދިދަ ބައިދަނޑިއަށް ވަނީ ތިރިކޮށްފައެވެ. އަދި މަރްޙޫމް ފަސްދާނުލެވުނީ ރަސްމީ އިއްޒަތުގައި ގަލޮޅު ސަހަރާގައެވެ.