އަހްމަދިއްޔާ ސްކޫލަށް 25 އަހަރު ހިދުމަތްކޮށްދެއްވި ޝާކިރު ނިޔާވެއްޖެ

އަހުމަދިއްޔާ އިންޓަނޭޝަނަލް ސްކޫލުއަށް 25 އަހަރު އަގުހުރި ހިދުމަތްތަކެއް ކޮށްދެއްވި، އިބްރާހިމް ޝާކިރު ރޭ ދަންވަރު ނިޔާވެއްޖެ އެވެ. ޝާކިރުގެ ހަރަކާތްތައް ކުއްލިއަކަށް ހުއްޓިގެން ހޮސްޕިޓަލަށް ގެންގޮސްފައިވަނީ ރޭ ދަންވަރު 3:30-4:00 ހާއިރެވެ. ގެންދިޔައިރު ވެސް ނިޔާވެފައިވާ ކަމަށް ޑޮކްޓަރުންނާ ހަވާލަދީ ސްކޫލުން ބުންޏެވެ. އޭނާ ނިޔާވިއިރު ހަތަރު ދަރީންނާއި އަނތްބަކު ވެސް ދުނިޔޭގައި އެބަހުއްޓެވެ. އުމުރުން ސާޅީހުގެ އަހަރުތައް ގުނަމުންދިޔަ ޝާކިރު ވަނީ އަހްމަދިއްޔާގެ ގްރޭޑް 12 ގެ ދަރިވަރުންތަކަކާއިއެކު މިދިޔަ ހޮނިހިރު ދުވަހު ހައްދުންމައްޗަށް ކުރި ފީލްޑް ޓްރިޕްގަައި ވެސް ބައިވެރިވެފައެވެ. އެ ދަތުރު ނިންމާލުމަށްފަހު މާލެ އައީ ރޭ 8:30 ހާއިރެވެ. އަހްމަދިއްޔާ ސްކޫލުގެ ޕްރިންސިޕަލް މުހައްމަދު ރަޝީދު ވިދާޅުވީ ޝާކިރަކީ ކުރިން އަހްމަދިއްޔާގެ ދަރިވަރެއް ކަމަށާއި އަދި އެއަށްފަހު ވަޒީފާއަށް ގުޅުނު ހިސާބުން ވެސް އޭނާ ވަނީ ސްކޫލަށް ގިނަގުނަ ކަންތައްތައް ކޮށްދީފައި ކަމަށެވެ. ރަޝީދު ސިފަކުރެއްވި ގޮތުގައި ޝާކިރަކީ އެ ސްކޫލުގެ މުހިއްމު "އެއް ތަނބެވެ." އެގޮތުން އެތައް އަހަރެއް ވަންދެން ކޮށްދެއްވި ހިދުމަތަށްފަހު ޝާކިރު ނެތްތަން ފޫބައްދަން އުނދަގޫވާނެ ކަމަށް ޕްރިންސިޕަލް ވިދާޅުވި އެވެ. ޑެޕިއުޓީ ޑިރެކްޓަރެއްގެ މަގާމު އަދާކުރަމުން އައި ޝާކިރުގެ ޒިންމާއަކީ އެ ސްކޫލުގެ އޯ ލެވެލް އަދި އޭ ލެވެލްގެ އިމްތިހާނަށް ސްކޫލުން ކުރަންޖެހޭ އިދާރީ ކަންކަން ބެލެހެއްޓުމާއި ބިދޭސީ މުވައްޒަފުންގެ ވިސާގެ ކަންކަން ބެލެހެއްޓުމެވެ. ޝާކިރުގެ ކަށުނަމާދު އޮތީ މިއަދު މެންދުރު ނަމާދަށްފަހުގައެވެ. ކަށުނަމާދުގައި ވީހާވެސް ގިނަ ބަޔަކު ބައިވެރިވުމަކީ އާއިލާއާއި ރަހުމަތްތެރިންގެ އެދުމެކެވެ.