ރާއްޖޭގެ އިސްތިގުލާލު ގެއްލި މިނިވަންކަމަށް ބުރޫ އަރާނީ ވެރިކަމުގަ ތިބަ ގަމާރުންނަށް ތަނެއްދޮރެއް ނޭނގޭތީ ކަމަށް އެމްޑީޕީގެ ޗެއާޕާސަން ރައީސް މުޙައްމަދު ނަޝީދު ވިދާޅުވެއްޖެ އެވެ.
އެމްޑީޕީގެ 6 ވަނަ ކޮންގްރެސް ހުޅުވާ ޖަލްސާގައި މިރޭ ވާހަކަދައްކަވަމުން ރައީސް ނަޝީދު ވިދާޅުވީ މުޅި ދުނިޔެ ފުރޮޅެމުން މިދަނީ ހަނގުރާމައިގެ ނުރައްކަލަށް ކަމަށާއި ހަނގުރާމައި ނުރައްކާ އޮތީ ހަމައެކަނި މެދުއިރުމައްޗަށް އެކަނި ނޫންކަމަށެވެ.
އިތުރަށް ތަފްސީލް ދެއްވަމުން ރައީސް ނަޝީދު ވިދާޅުވީ ޝާމްކަރަ އާއި ޔޫރަޕާއި އެފްރިކާއަށް ހަނގުރާމަ ފުޅާވަމުން އަނަނަ ކަމަށާއި، އަދި މިހާރު ހަނގުރާމަ އެއަންނަނީ ރާއްޖޭގެ ގޮނޑުދޮށަށް ކަމަށެވެ.
ނަމަވެސް މިކަން މިހެންވަމުންދާއިރު ދިވެހިރާއްޖޭގެ ވެރިންގެ އެންމެ ބޮޑު މަސައްކަތަކަށް ވާންވާނީ ދިވެހިންގެ ސަލާމަތާ ރައްކާތެރިކަން ކަށަވަރުކުރުން ކަމަށާއި، ވެރިން އަބަދުމެ ތިބެންޖެހޭނީ އެ ހިސާބުޖަހަން ކަމަށެވެ.
ނަމަވެސް ރާއްޖޭގެ ވެރިކަމުގަ މިހާރު ތިއްބެވި ފަރާތްތަކަށް އެކަމެއް ނުކުރެވޭ ކަމަށާއި، އަދި އެކަންކުރާކަށްވެސް އެ ބޭފުޅުންނަކަށް ނޭނގޭ ކަމަށާއި، އެބޭފުޅުން އެއްދުވަހު ހައްދަވާގޮތެއް އަނެއްދުވަހު ނުހައްދަވާ ކަމަށްވެސް ރައީސް ނަޝީދު ވިދާޅުވި އެވެ.
މީގެ އިތުރުން ބައިނަލްއަގުވާމީ ގުޅުންތައް ބާއްވަންވީ ގޮތެއްވެސް ރާއްޖޭގެ ވެރިކަމުގައި މިހާރު ތިބި ފަރާތްތަކަށް ސާފު ނުވާ ކަމަށާއި، އެއްގޮތަކަށްވެސް މިދުނިޔެ ހިނގާގޮތެއް ވެރިކަމުގެ ތިބި މީހުންނަކަށް ނޭނގޭ ކަމަށްވެސް ރައީސް ނަޝީދު ވިދާޅުވި އެވެ.
އެހެންކަމުން ވެރިކަމުގަ މިހާރުތިބި ފަރާތްތަކުގެ އަތްމަތީގައި ރާއްޖެ ބާއްވަން ހެޔޮނުވާނެ
ކަމަށްވިދާޅުވެ ރައީސް ނަޝީދު ވިދާޅުވީ މިނިވަންކަން ގެއްލޭނީ ބޭރުގެ ވިޔަފާރިވެރިންނަށް ވިޔަފާރިކުރުމުގެ ހުއްދަދީގެނެއްނޫން ކަމަށާއި، ނުވަތަ ބޭރުގެ މީހުން މިތަނުގަ ދިރިއުޅުމުގެ ހުއްދަ ދީގެނެއްވެސް ނޫން ކަމަށެވެ.
"އަޅުގަނޑުމެންގެ އިސްތިގުލާލު އަޅުގަނޑުމެންގެ މިނިވަންކަން ގެއްލި ބުރޫ އަރައިގެންދާނީ އަޅުގަނޑުމެންގެ ވެރިންނަށް ތަނެއްދޮރެއް ނޭނގުނީމަ, މިތިބަ ގަމާރުން އަޅުގަނޑުމެންގެ ވެރިކަމުގަ ތިބީމަ"، ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ އެމްޑީޕީއަކީ ދުނިޔޭގެ ވައްޓަފާޅި ވަރަށް ރަނގަޅަށް ދަންނަ ޕާޓީއެއް ކަމަށާއި، ދިވެހި ރާއްޖެ އުފެދިފައި އޮތީ ކޮންތާކުކަން އެމްޑީޕީއަށް އިނގޭ ކަމަށެވެ. އަދި މި ރާއްޖެއަށް ކުރިއަށްދެވޭނީ އަވަށްޓެރިންނާ އެކީ ކަމާއި އަވަށްޓެރިންނަކީ ކޮބައިކަން އެމްޑީޕީއަށް އެނގޭ ކަމަށާއި، ގުޅުންތަރުތީބުކުރަންވީ ގޮތްވެސް އެމްޑީޕީ އަށް އިނގޭ ކަމަށްވިދާޅުވެ ރައީސް ނަޝީދު ވިދާޅުވީ ގުޅުން ތަރުތީބުކުރުމުގަ އިންޑިއާ އިސްކުރުމަކީ ރައްޔިތުންނަށް ބިކަވާނެ ކަމެއްނޫން ކަމަށެވެ.
އަދި ދަރަނި އަދާކުރާނެ ގޮތުގެ އެއްވެސް ވިސްނުމެއްވެސް މިސަރުކަރަށް ނޭނގޭ ކަމަށާއި،
ބޭރުން ޑޮލަރެއް ނުގެނެވުނުތާނގައި ރާއްޖޭގައި ޑޮލަރު ބޭރުކޮށް ހުސްކުރިއިރު ކާބޯތަކެތި އެތެރެކުރާނެ ޓީޓީ ހަދާނެ ގޮތްވެސް މިހާރު މިގައުމުގައި ނެތްކަމަށް ރައީސް ނަޝީދު ވިދާޅުވި އެވެ. އަދި މިކަންކަން މިހެންވާއިރު އެމްޑީޕީން ނުތިބޭނެ ކަމަށާއި، އެމްޑީޕީން ނިކުމެ މި ސަރުކަރު ބަދަލުކުރަނެ ކަމަށްވެސް ރައީސް ނަޝީދު ވިދާޅުވި އެވެ.
