މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ކޮންގްރެސްގެ ބައިވެރިންނާ ބައްދަލުކޮށް، އެޕާޓީގެ އަސާސީ ޤަވާއިދަށް ކުރީގެ ޗެއާޕާސަން ފައްޔާޒް އިސްމާއިލް ހުށަހަޅާ އިސްލާހުތަކާ ގުޅޭ މައުލޫމާތު ދެއްވައިފި އެވެ.
އެމްޑީޕީގެ ކޮންގްރެސްގައި ބައިވެރިވުމަށް މާލެ އައިސްތިބި އެ ޕާޓީގެ ކޮންގްރެސްމަނުންނާ ފައްޔާޒް ބައްދަލުކޮށްފައިވަނީ މިއަދު ހަވީރު މާފަންނު މަދުރަސާގައެވެ.
އެ ބައްދަލުވުމުގައި ފައްޔާޒުވަނީ އެ ޕާޓީގެ އަސާސީ ޤަވާއިދަށް ފައްޔާޒު ހުށަހަޅާ އިސްލާހުތަކާ ގުޅޭ މައުލޫމާތު ކޮންގްރެސްގެ ބައިވެރިންނަށް ދެއްވާފައެވެ.
އެގޮތުން ފައްޔާޒް ވިދާޅުވީ އެ ޕާޓީގެ އަސާސީ ޤަވާއިދަށް ބޮޑެތި ބަދަލުތަކެއް ގެނައުމަށް ހުށަހަޅުއްވާނެ ކަމަށާއި، މައިގަނޑު ގޮތެއްގައި އެ ބަދަލުތަކަކީ އެމަނިކުފާނާއި ރައީސް ނަޝީދު މި ރާއްޖެއަށް ގެންނަވަން ހުށަހަޅުއްވާ ބޮޑު ބަދަލާ ގުޅުންހުރި ބަދަލުތައް ކަމަށެވެ.
އެކަންކަމުގެ ތަފްސީލް ދެއްވަމުން ފައްޔާޒް ވިދާޅުވީ އަސާސީ ޤަވާއިދަށް ގެންނަ އެންމެ ބޮޑު އެއް ބަދަލަކީ އެ ޕާޓީގެ ރައީސް އާއި ނައިބް ރައީސްގެ މަޤާމު އުވާލައި އެ ޕާޓީގެ އެންމެ އިސް ފަރާތަކީ ޗެއާޕާސަންގެ ގޮތުގައި ކަނޑަޢެޅުން ކަމަށެވެ.
އަދި މީގެ އިތުރުން އެ ޕާޓީގެ ގައުމީ މަޖިލީހުގެ މެންބަރުންގެ ގޮތުގައި ކޮންމެ ރަށަކުން މެންބަރުން ކަޑައެޅުމާއި އަދި އެ ރަށްރަށުގެ ޕާޓީގެ ދަފްތަރަށް ބަލައި ގައުމީ މަޖިލީހުގެ މެންބަރުންގެ އަދަދުވެސް އިތުރުކުރުމަށް ހުށަހަޅާ ކަމަށާއި އެގޮތުން މެންބަރުންގެ އަދަދު 500 އަށްވުރެ މަދުނަމަ ގައުމީ މަޖިލީސް 1 މެންބަރު، 500 އާއި 1000 އާއި ދެމެދުނަމަ 2 މެންބަރު އަދި 1000 އަށްވުރެ އިތުރުނަމަ 3 މެންބަރުން، ސިޓީތަކުން ރައްޔިތުންގެ މަޖިލީހުގެ ކޮންމެ ދާއިރާއަކަށް 1 މެންބަރު އަދި ރަށްރަށެކޭ އެއްގޮތަށް ސިޓީތަކުގެ ދާއިރާތަކުގެ މެންބަރުންގެ އަދަދަށް ބަލައި މެންބަރުން އިތުރުކުރާ ގޮތަށާއި، މީގެ އިތުރުން ކޮންމެ އަތޮޅަކުން ރައްތިތުންގެ މަޖިލީހުގެ ދާއިރާތަކުގެ އަދަދަށް އަތޮޅުގެ މެންބަރުން ވޯޓުލައިގެން ހޮވާ މެންބަރުންވެސް އެ ބަދަލުތަކުގެ ތެރޭގައި ވަނީ ހިނަމާފައެވެ.
ފައްޔާޒު ވިދާޅުވީ އަތޮޅު ތަކުން ނަގާ މެންބަރުންނަކީ ބޮޑު ދބަދަލުގައި ބުނާ ގޮތަށް ރައްޔިތުންގެ މޖިލީސް އެކުލަވާލާ ގޮތާ އެއްގޮތަށް ނަގާ މެންބަރުން ކަމަށެވެ.
މީގެ އިތުރުން އެ ޕާޓީގެ ހިންގުން އިތުރަށް ހަރުދަނާ ކުރުމަށް ޑެޕިއުޓީ ޗެއާޕާސަންގެ ގޮތުގައި އިތުރު 3 މެންބަރުން ކަނޑައެޅުމާއި އޭގެ ތެރޭގައި ޗެއާޕާސަންގެ ނައިބު އިދާރީ، މާލީ، އަސި ސިޔާސީ ހިމެނޭ ކަމަށާއި އޭގެ ތެރެއިން އެއް ނައިބް އަކީ އަންހެނަކަށް ވާންޖެހޭނެ ކަމަށްވެސް ފައްޔާޒު ހުށަހަޅާ ހުށަހެޅުމުގައި ހިމަނާފައިވާނެ ކަމަށް އެމަނިކުފާނު ވިދާޅުވިއެވެ.
އެ ޕާޓީގެ ގައުމީ މަޖިލިސް ފަށާނީ މިރޭ 8:30 ގައި މާލެ ސިޓީ ހޯލް ގައެވެ.
