މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ރިޔާސީ ޕްރައިމަރީގައި ވާދަކުރައްވާނެ ކަމަށް މިހާތަނަށް ހާމަ ކުރެއްވި ބޭފުުޅުންގެ ތެރެއިން “ރަސްމާލެ ވިއްކާލުމާ ފާޅުގަ ދެކޮޅު ހަދަންކެރިވަޑައިގަތީ ފައްޔާޒް އަށް ކަމަށް އެ ޕާޓީގެ ގައުމީ މަޖިލިސްމެންބަރު އަކްރަމް ކަމާލުއްދީން ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓްގައި އަކްރަމް ވިދާޅުވީ MDP އިން މިހާތަނަށް ރިޔާސީ ޕްރައިމަރީގައި ވާދަކުރައްވާނެ ކަމަށް ހަމަ ކުރެއްވި ބޭފުުޅުންގެ ތެރެއިން “ރަސްމާލެ ގެ ޑީލް “ އާއި ބެހޭގޮތުން ފާޅުަގައި ފާޑުވިދާޅުވަން ކެރިވަޑައިގަތީ ހަމައެކަނި ފައްޔާޒް އަށް ކަމަށެވެ.
އަކުރަމް އެހެން ވިދާޅުވިއިރު ފައްޔާޒް އިސްމާއިލް ވަނީ ރަސްމާލޭގެ 2 ބައިކުޅަ 1 ބައި ޔުނައިޓެޑް އަރަބް އެމިރޭޓްސްގެ އީގަލް ހިލް ކިޔާ ކުންފުޏަކަށް އަގަކާ ނުލައި ވިއްކާމާ ދެކޮޅަށް އިނގިރޭސިބަހުން އެކްސްގައި ޕޯސްޓެއްކުރައްވާފައެވެ.
ޔުނައިޓެޑް އެރަބް އެމިރޭޓްސްގެ އީގަލް ހިލްސް ކުންފުންޏަށް ރަސްމާލޭގެ ބިމުން ބޮޑު ބައެއް ދީފައިވާ މައްސަލާގައި އިނގިރޭސިބަހުން ނެރެފައިވާ ބަޔާނުގައި ފައްޔާޒް ވިދާޅުވެފައިވަނީ އެ އެއްބަސްވުމަކީ އެތައް ބައިވަރު ސުވާލުތަކެއް އުފެދޭގޮތަށް ސިއްރުން ވެފައިވާ އެއްބަސްވުމެއް ކަމަށެވެ.
ބިދޭސީންނަށް ރާއްޖޭގެ ބިން އެއްވެސް ސިފައެއްގައި މިލްކު ކުރެވޭ ގޮތަށް އެ އެއްބަސްވުމުގައި އޮތްކަމަށް އުފައްދާފައިވާ ސުވާލުތަކަށް ސަރުކާރުން ޖަވާބުދެއްވައި އެއްބަސްވުން ރައްޔިތުންނަށް ހާމަކުރަންވެސް ފައްޔާޒުގެ ބަޔާނުގައި ސަރުކާރަށް ވަނީ ގޮވާލާފައެވެ.
މީގެ އިތުރުން ފައްޔާޒުވަނީ އެ އެއްބަސްވުމާގުޅޭ ކަންބޮޑުވުންތަކެއް ހާމަކޮށްފައެވެ.
އެގޮތުން ބިން މިލްކު ކުރެވުމާމެދު ކުރެވޭ ސުވާލުތަކަށް ސަރުކާރުން ޖަވާބުދާރީ ވުމާއި، އީގަލް ހިލްސް އަށް ދީފައިވާ 500 ހެކްޓަރު ބިމުގެ އަގުމަގު ކުރުމާއި، އެހާ ބަލިކަށި އެއްބަސްވުމެއް ސަރުކާރުން ހަދާފައިވާ ސަބަބާއި، އެކަމުގެ ވަށައިގެންވާ ހުރިހާ ކަމެއް ހާމަކޮށްފައި މެނުވީ ޕްރޮޖެކްޓު ކުރިއަށްގެންދަން ގާނޫނުން މަޖުބޫރު ނުކުރުމަށް ފައްޔާޒު ވަނީ ސަރުކާރަށް ގޮވާލާފައެވެ.
އަދި އީގަލް ހިލްސްގެ އަތުން ރަސްމާލެ ބިން ގަންނަ ފަރާތްތަކުން 99 އަހަރުގެ ލީސް ހަމަވުމުގެ ކުރިން ރަސްމާލޭގެ ޕްރޮޕަޓީތައް ވިއްކާލައިފި ނުވަތަ ވާރުތައިން ދީފި ނަމަ، އަލުން 99 އަހަރުގެ ކުލީގެ މުއްދަތެއް ފެށޭތީ އެކަމަކީ ކަންބޮޑުވުމެއްގެ ގޮތުގައި ފައްޔާޒް ވަނީ ފާހަގަކޮށްފައެވެ.
