ސަރުކާރު ހިއްސާވާ ކުންފުނިތަކުން މުވައްޒަފުން ވަކިކުރަނީ އެ ފަރާތްތަކަށް މާ ރަނގަޅު ގޮތްތަށް ހޯދައިދީފައި ކަމަށް ފިނޭންސް މިނިސްޓަރ ހަސަން ޒަރީރް ވިދާޅުވެއްޖެ އެވެ.
ރައްޔިތުންގެ މަޖިލީހުގައި ވާހަކަދައްކަވަމުން މިނިސްޓަރ ޒަރީރް ވިދާޅުވީ ސަރުކާރު ހިއްސާވާ ކުންފުނިތައް "ރައިޓް ސައިޒް" ކުރުމަށް ކުރާ މަސައްކަތުގެ ދަށުން ކުންފުނިތަކުން ވަކިކުރާ މުވައްޒަފުންނަށް އަމިއްލަ ވިޔަފާރި ފަށަން ފަންޑެއް ސަރުކާރުން ޤާއިމުކޮށްފައިވާ ކަމަށާއި، ސަރުކާރު ހިއްސާވާ ކުންފުނިތަކުން މުވައްޒަފުން ވަކިކުރުމަށް ނިންމާފައިވަނީ އެ މުވައްޒަފުންނަށް އިތުރު ގޮތްތައް ހޯދައިދިނުމަށްފަހު ކަމަށެވެ.
އެ ކަމުގެ ތަފްސީލް ދެއްވަމުން މިނިސްޓަރ ޒަރީރް ވިދާޅުވީ ސަރުކާރު ކުންފުނިތައް "ރައިޓް ސައިޒް" ކުރާއިރު ވަޒީފާއަކުން އަމިއްލައަށް ވަކިވާ މުވައްޒަފުންނަށް ވިޔަފާރި ފެށުމަށް އެހީތެރިކަން ފޯރުކޮށްދިނުމުގެ ގޮތުން "ކުމެވި"ގެ ނަމުގައި އެސްއެމްއީ ޑިޖިޓަލްގައި 600 މިލިޔަން ރުފިޔާގެ ފަންޑެއް މިހާރު ޤާއިމުކޮށްފާއިވާ ކަމަށެވެ.
އަދި މި ލޯނަކީ ވަޒީފާއިން ވަކިވާ ފަރާތްތަކާއި ވަޒީފާއިން ވަކިކުރާ ފަރާތްތަކުން ޕްރޮޕޯސަލް ހުށަހެޅުމުން ލޯނު ޕްރޮޕޯސަލަށް ބަލައި އެސްއެމްއީ ބޭންކުން ލޯނު ހަމަޖައްސައިދޭގޮތަށް ފަރުމާކޮސްފައި ލޯނު ސްކީމެއް ކަމަށާއި، އަދި ޕްރޮޕޯސަލްވެސް ބީސީސީ މެދުވެރިކޮށް ތައްޔާރު ކޮށްދޭނެ ކަމަށްވެސް މިނިސްޓަރ ވިދާޅުވިއެވެ.
