ތިނަދޫގައި ބައިނަލްއަގުވާމީ އެއާޕޯޓެއް އަޅަނީ

ގދ.ތިނަދޫ ގައި ބައިނަލްއަގުވާމީ އެއާޕޯޓެއް އެޅުމަށް ތައިލެންޑުގެ ޕޭން ޕެސިފިކްއާ ހަވާލުކޮށްފިއެވެ. މިކަމަށްޓަކައި ތިނަދޫ ސްކޫލުގައި ބޭއްވި ޖަލްސާގައި އެއާޕޯޓު ހެެދުމުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ އިންފްރާސްޓްރަކްޗާ މިނިސްޓަރ ޑރ. އަބްދުﷲ މުއްތޮލިބެވެ. ޕޭން ޕެސިފިކްއާގެ ފަރާތުން ސޮއި ކުރެއްވީ އެ ސީއީއޯ ޒިރާޓް ޕެތްނުންތަވޮން އެވެ. މި އެއްބަސްވުމުގެ ދަށުން ތިނަދޫގައި އެއާޕޯޓް އެޅުމަށް ހަމަޖެހިފައިވަނީ ފަޅުން ބައެއް ހިއްކައިގެންނެވެ. މި އިންވެސްޓްމަންޓުގެ އަގު 500 މިލިއަން ޑޮލަރަށްވުރެ ބޮޑުވާނޭކަމަށް ސަރުކާރުން ބުނެއެވެ. އަދި މި މަޝްރޫއަށް ސަރުކާރުން އެއްވެސް ހަރަދެއް ކުރަން ނުޖެހޭނޭކަމަށްވެސް ސަރުކާރުން ބުނެއެވެ. https://twitter.com/presidencymv/status/1760003402183127523 މި މަޝްރޫޢުއަށް ތިނަދޫފަޅޫން 50 ހެކްޓަރުގެ ބިން ހިއްކުމަށް ހަމަޖެހިފައިވައިރު، އެއާޕޯޓް ރަންވޭ ތަރައްޤީކުރާނީ އެއާބަސްގެ އެންމެ ބޮޑެތި މަތިންދާބޯޓުތަކަށް ޖެއްސޭ ގޮތަށެވެ. ތިނަދޫ އެއާޕޯޓް މަޝްރޫޢުގެ ދަށުން، ފިއުލްފާމް، ކާގޯ ސާވިސްގެ އިތުރުން ސީޕެލޭން ހަބަކާ، ފްލައިން ސްކޫލެއްވެސް ގާއިމްކުރުމަށް ވަނީ ހަމަޖެހިފައެވެ. އެއްބަސްވުމާ ގުޅޭގޮތުން އިންފްރާސްޓްރަކްޗާ މިނިސްޓަރ ޑރ. އަބްދުﷲ މުއްތޮލިބް ވިދާޅުވީ ތިނަދޫގައި ފެށުމަށް ހަމަޖެހިފައިވާ މި މަޝްރޫޢުއާއެކު އެތަނަށް ގިނަ އަދަދެއްގެ ރިސޯޓްތަކެއް އަންނާނޭކަމަށެވެ. މިގޮތުން 12 ރިސޯޓް ތަރައްޤީކުރެވޭއިރު، އެއީ 2،000 ހާހަށްވުރެ ގިނަ އެނދުކަމަށްވެސް މިނިސްޓަރު ވިދާޅުވިއެވެ.