އިޓަލީން ރާއްޖެ އަންނަ ޓޫރިސްޓުން އިތުރުވާން ފަށައިފި

މިފަހަރުގެ ޓޫރިޒަމް ސީޒަނުގައި އިޓަލީވިލާތުން ރާއްޖެއަށް ޒިޔާރަތްކުރާ ޓޫރިސްޓުންގެ އަދަދު އިތުރުވާން ފަށައިފިއެވެ. ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު، މިހިނގާ ޖެނުއަރީމަހުގެ ނިޔަލަށް ރާއްޖެއަށް ދެވަނައަށް އެންމެ ގިނަ ޓޫރިސްޓުން ޒިޔާރަތްކޮށްފައިވަނީ އިޓަލީވިލާތުންނެވެ. މިދިޔަ އަހަރުގެ މި މުއްދަތުގެ ތެރޭގައި އިޓަލީ އުޅެނީ މި ލިސްޓުގެ 6 ވަނައިގައެވެ. މިމަހުގެ 9 ވަނަ ދުވަހުގެ ނިޔަލަށް އިޓަލީވިލާތުން ރާއްޖެއަށް ވަނީ 7,204 ޓޫރިސްޓުން ޒިޔާރަތްކޮށްފައެވެ. ޔޫރަޕުން ރާއްޖެއަށް ޒިޔާރަތްކުރާ ޓޫރިސްޓުންގެ އަދަދު އިތުރުކުރުމަށް މިދިޔަ ސަރުކާރުން ކުރި މަސައްކަތްތަކާއިއެކު މިދިޔަ އަހަރު، ޔޫރަޕުން ރާއްޖެއަށް ޒިޔާރަތްކުރި ފަތުރުވެރިންގެ އަދަދު ވަނީ ވަރަށްބޮޑަށް އިތުރުވާން ފަށާފައެވެ. މިގޮތުން ސަރުކާރުން ކުރި މަސައްކަތްތަކާއެކު 2022 ވަނަ އަހަރު ނިމެންއުޅެނިކޮށް އިޓަލީ ވިލާތުގެ ގައުމީ އެއާލައިން އައިޓީއޭ އެއާވޭސްގެ ދަތުރުތައް ރާއްޖެއަށް ފަށާފައިވާކަން ފާހަގަކޮށްލެވެއެވެ. މިދިޔަ އަހަރު ނިމުނުއިރު ރާއްޖެއަށް 1.8 މިލިއަން ޓޫރިސްޓުން ޒިޔާރަތް ކުރިއިރު، އިޓަލީވިލާތުން ވަނީ 118,412 ޓޫރިސްޓުން ރާއްޖެއަށް ޒިޔާރަތްކޮށްފައެވެ. އިޓަލީވިލާތަކީ ރާއްޖޭގެ ޓޫރިޒަމް ސިނާއަތުގައި ވަރަށް ހާއްސަ މާކެޓެކެވެ. ރާއްޖެއަށް 1972 ވަނަ އަހަރު ޓޫރިޒަމް ތައާރަފްވެގެން އާއިރު، ޓޫރިސްޓެއްގެ ގޮތުގައި ރާއްޖެއަށް އެންމެ ފުރަތަމަ ޒިޔާރަތްކުރީ އިޓަލީވިލާތުގެ ރައްޔިތެކެވެ. މިދިޔަ އަަހަރު ރާއްޖެއަށް އެންމެ ގިނައިން ޓޫރިސްޓޫން ޒިޔާރަތްކޮށްފައިވަނީ އިންޑިއާއިންނެވެ. އެއީ 209,198 ޓޫރިސްޓުންނެވެ. ދެވަނަ އަށް ރަޝިއާއިން 209,146 ޓޫރިސްޓުން ޒިޔާރަތްކުރިއިރު، ތިން ވަނައަށް އެންމެ ގިނަ ޓޫރިސްޓުން ޒިޔާރަތް ކޮށްފައިވަނީ ޗައިނާއިންނެވެ.