ހުޅުމާލެ ފޭސް އެކެއްގެ ރަށު މާރުކޭޓުން ގޮޅި ދޫކުރަނީ

ހުޅުމާލެ ފޭސް އެކެއްގައި ހުންނަ ރަށު މާރުކޭޓުން ބީލަމުގެ އުސޫލުން ގޮޅި ދޫކުރުމަށް ހުޅުވާލައިފިއެވެ. އެޗްޑީސީން ބުނީ އެ މާރުކޭޓުން ގޮޅި ދޫކުރުމަށް ހަމަޖެހިފައިވަނީ، ބީލަމުގެ އުސޫލުން ބީލަން ހުށަހަޅާ ފަރާތްތަކުގެ ތެރެއިން އެންމެ މަތީ އަގެއް ހުށަހަޅާ ފަރާތްތަކަށް ކަމަށެވެ. ގޮޅީތަކުގެ ބީލަން ފެށޭ އަގެއްގެ ގޮތުގައި ހަމަޖައްސާފައިވަނީ މަހަކަށް 3،500 ރުފިޔާ އެވެ. ބީލަން ހުށަހެޅުމަށް ދީފައިވާ ތާރީހަކީ އަންނަ މާރޗްމަހުގެ 13 ވާ ބުދަ ދުވަހުގެ 09:30 ހުން ފެށިގެން 11:00 އާ ދެމެދު، އުމަރު ޒާހިރު އޮފީސް އިމާރާތުގެ 6 ވަނަ ފަންގިފިލާގައެވެ. ބީލަން ހުޅުވުމަށް ނިންމާފައިވަނީ އެދުވަހުގެ 11:00 ގައެވެ. އަދި ގޮޅި އިހުތިޔާރުކުރުން ކުރިއަށްގެންދިއުމަށް ހަމަޖެހިފައިވަނީ މާރޗްމަހުގެ 20 ވަނަ ދުވަހު އެޗްޑީސީ އިމާރާތުގައެވެ. އެޗްޑީސީން މިފަހަރު ދޫކުރުމަށް ނިންމާފައިވަނީ ރަށު މާރުކެޓުގެ ގޮޅިތަކުގެ ތެރެއިން 11 ގޮޅިއެކެވެ. ގޮޅިއެއްގެ ބޮޑުމިނަކީ 73.33 އަކަފޫޓެވެ.